Popular Bible Verses from တမန်တော် 1

Share

အယ်ဘေမဲ့ နန်းနို့ထတ်ဟှို သန့်ရှင်းဟှူဝိညာဉ်တော် ကြွလာဟှူ ခီမာ နန်းနို့ဟှာ တဂိုးဟှို ရဂေ့လေ့မယ်။ အယ်ဘီးမှ နန်းနို့ဟှာ ယေရုရှလင်ဗြို့၊ ယုဒနယ်န ရှမာရိနယ် တနယ်လောင်းဟှနေ မ္လေဂီးဆောင်းထိ ငါ့ရဲ့ သတ်သေလေ ဖြစ်ဂေ့လေ့မယ်” ဆိုဘီး သူးနို့ဟှို မိန့်တော်မူလေဟှယ်။

ယေရှုဟှ “ငါ့ဖရဲ့ ခွမ့်အာဏာန စီရင်ဟှားဟှူ နေ့ရစ်ခီလေဟှို နန်းနို့ဟှာ သိခွမ့် မှေ့ဟှ။

သူးနို့လေဟှာ စုလာဂေ့ဟှူ ခီမာ ကိုယ်တော်ဟှ “ယေရုရှလင်ဗြို့ဟှနေ ထွပ်ဟှားဂေ့ဘဲ့န ငါ့ဖရဲ့ ဂဒိဟှို စောန့်နေဂေ့။ ငါဟှာ အယ်ဂဒိကြောန်းဟှို နန်းနို့ဟှို ပြောပြဟှားပီးဘီ။ ယောဟန်ဟှာ ရေန ဗတ္တိဇံပေးဟှယ်။ အယ်ဘေမဲ့ နန်းနို့ဟှာ ရစ်နဲနဲ ကြာဘီးဟှာ သန့်ရှင်းဟှူဝိညာဉ်တော်န ဗတ္တိဇံဟှို ခံရဂေ့လေ့မယ်” ဆိုဘီး ပြောလေဟှယ်။

ကိုယ်တော်ဟှာ သေခံဘီးန ရစ်လေးဆယ် လောင်းလောင်း ခီဘောင်ဂီး ကိုယ်ထန်ရှားပြဘီး မိမိသတ်ရှင်ကြောန်းဟှို ခိုင်လောင်ဟှူ သတ်သေပြလေဟှယ်။ တမန်တော်လေဟှာ ကိုယ်တော့်ဟှို ဗြင်ရဂေ့ဘီး ကိုယ်တော်ဟှလည်း သူးနို့ဟှို ဘုရားသခင်ရဲ့ နိုင်ငံတော်ကြောန်းဟှို ပြောပြလေဟှယ်။

အယ်မျိုး ပြောဘီးန သူးနို့လေဟှာ ကေ့နေဒူးမာ ကိုယ်တော်ဟှာ ကောန်းဂန်ဘောင်ဟှို ယူဆောန်ခံရလေဟှယ်။ အယ်ဘီးမှ မိုးတီဟှာ ကိုယ်တော့်ဟှို သူးနို့ရဲ့ မျစ်စိရှေ့ဟှနေ ဖောင်းဟှားလေဟှယ်။

ကိုယ်တော် တတ်ကြွဟှားဇာဟှို သူးနို့လေဟှာ ကောန်းဂန်ဟှို စေ့စေ့ကေ့နေဂေ့ဟှယ်။ အယ်ခီမာ ဝတ်ဖ္လူစင်ကြယ်န လူနှေ့ယော့‑က်ဟှာ ရောက်တရစ် သူးနို့ရဲ့ နားမာ ရပ်နေဘီး အယ်လူလေဟှာ “ဂါလိလဲနယ်သားလေ၊ နန်းနို့ဟှ ဖြားဖြစ်ကြောန့် ရပ်ဘီးဟှာ ကောန်းဂန်ဟှို ကေ့နေဂေ့နူး။ နန်းနို့နားဟှနေ ကောန်းဂန်ဘောင်ဟှို တတ်ကြွဟှားဟှူ အယ်ယေရှုဟှာ ကောန်းဂန်ဟှို တတ်ကြွဟှားဇာဟှို နန်းနို့ ဗြင်ရမျိုးဘဲ့ ပ္လန်ဘီး ကြွလာလေ့မယ်” ဆိုဘီး ပြောဂေ့ဟှယ်။