Popular Bible Verses from Markus 9

Share

Wene aro molbaogpa, Yesusti samoro ambarelamogti, “Sa'a sembe andi nanag, ‘Yepsinep to, kom to,’ aro haibanelam? Allahri elag sikne aro wana palirop nimi sembe nia mangkina uanep,” seog.

Yesusti wene seog abeneko pere, me eneko ili ponekori yubu haum aro lelamogti, “Nari sik senelamna aghana, nari sik senenne kom taleagti, nari anag sikne aro wana pimnunne yepnululam,” seog.

Me eneko wali taogti sekogpa, Yesus eldi yubu ka'ero neleptop nangap ae lomag wa'ina, mo wamek. Sin Yesusap nhon mo wamekti, elag hailamekti, “Sa'a sembe nuri phia me eneko kulomag ua uropne neneko nuri yag lambanep kom?” aro haibaek. Wene aro haibaekpa, Yesusti samoro ambarelamsiogti, “Phia yonge nene saogne yag lambahinep nena, mo yubuag agha, ‘Lambae,’ arop tanena, yag lambanep kom. Ot Allahag molona mololapmun taneogna, el mikipne pere agha yag lambanep,” seog.

Garamna sao wali aghana, emem aropne kom tale tanena, nimiri nen samoro garam sao wali nembanep komdi, teba'en sembanep. Ane saog uro, a'un mamun ma'ap tangto wapmunneag agha garam sao walinge yamolamloa saog ulapmundi, waptan koma ma'al dalamlulom,” seog.

“Me ologne nene saog nimi nhon wamleba, nimi etneri nari siag kekhaekto nembaleri, ‘Yesus kiploa saog uro kipnun,’ aro toro piple tanena, nimi enekori na babe toro pimneloa saog ulamlul. Na toro kipnelul nimi eneko na mo kipnelul kom aghana, na kipnelenge pere agha na mog so'oag pogneogne poneko babe kiplul,” seog.

Tam nene sembe yubu sikne agha ambatnuahin. Nimi etneri a'un sembe, ‘Allahri wepto poghogne Kristus poneko ma'ap tangtop nimi wamlom nimi yepsisene,’ aro a'un mag tebatsile nimi babe, Allahri ekon tan koma nimi eneko sembe kamna tatlul,” seog.

Wene seogti, Yesusti sunumna yubu etpare nen lelamogti, “A'undi usa, ‘Etne nubunge,’ aro leptalom aghana, sin olog nimi agha nanag sikne aro wana palilamneang nena wali. Wali aghana, olog nimiri nanag wana paliro nelebanep ina toman nimi nhondi sindi wana toro, ‘Wail ibarukang,’ aro punpun tiptoba pipleba, puri tikto phukul ingkiik tanena, punpun tiptoba piple nimi enekoag Imagneri tam ikinne piplul. Punpun tiptoba piple nimi eneko ngangag kirik ikinne kerekto mag laut longorop mag nubungeag talobol pinepne ane olog keyagman saog. Imagneri nimi enekoag ikinne piplulne aghabog ikin sirik.

Haing tarari kemelapmenne agha, an malingeag phukul ingilapmen tanena, ‘Malia uaneag,’ aro haing wana neneko kwheloplulam. Haing ni phende wali wamnep aghana, malia ulapmenne sembe an sarangtop kom auk nubungeag nimi teptoba urobag toboglopkeleba, sop-sop ebek mheklamloa teptop komag ya'ag wapmen tanena, wali senep kom. An haing wana nhonog uro Allahri saelba ulamsil nimi tanep ina wa'imenba, saelba ulangkele, taneogna wali.