Popular Bible Verses from João 1

Share

Oro wari' co tomi' querec te nonon ma' iri nana ne, co howa nonon ma', mi' tata pain ca mana panxica Iri' Jam pin caca.

Pain cara pane, pain ca om om wet ne macan' pane, wara ma' na co ma' co ac capijacon Iri' Jam, ac je na wixicon. Wara pe ho' non Iri' Jam. Iri' Jam na quem.

Pain ca ac naran ca ma', toha mi' nonon oro wari' co ac ca to cacain ca jitacat nein xim pain ca om howa cocon Iri' Jam ma', co taramaxicon ne nonon Caxicon Jam. An hwet mi' nonon con Iri' Jam co iri'o'. Om ca to' quiji' pin ac con Iri' Jam Caxicon Jam ta.

Wari' pin na co ma' co capijacon Iri' Jam na wixicon. Pe ho' napari' pane. Querec pin' urun pain ca awi tamana nucun pain ca hwara' opa nucun pain ca Iri' Jam nucun. Xi Iri' Panxica Iri' Jam ara ca ta. Om ca noc capari', xiram pa' tamana napari'. Tomi' iri'o' e' na.

Wirico co quep quep pi' pin nain oro carawa pane quem. Om ca ma' camain' ne oro carawa ca om quep ca. Wirico co to' e' napari'. Mi' napari' pain ca e' cara wa. Ca e' nucun ca to' e' napari' ca', ac naran na, toha mi' napari' pain ximixi'. Ma' ta querec pin' hwein oro ca iri'o' wa con Iri' Jam ta napari'.

Xec pin iri na ne, querec ac con na Jeju João ma', pain ca xut hwet ton con ma'. Tomi' ac ca na: Noro jun co ma' co ac Wijimain Taramaji Ovelha nucun Iri' Jam ma'. Mi' pin pe rain maxicocon oro wari' ta non Iri' Jam pari'. Win ne wijimain taramaji ovelha ca mi' pin pe nain maxixi'. Xic am pin tain nain ca caracat nexi' ta na ca tomi' ca ma'.

Co ac iri' naran ma', pe paxi' nain macan' pane. Wirico co win mu ca Iri' Jam pain ca quep qui' cain macan' cocon oro wari' pane, ane om querec pin' cocon oro wari' ne. Pe paxi' nain macaracon, ane om tomi' querec te cocon oro win ma' ca ne.

Co ac iri' naran ma', hwet hwet xam' napari' pain ca wari' nexi'. Toha mi' napari' pain ximixi' ca'.

Moisés cara pane, tomi' hwet napari' pain oro ca tomi' ha' je capari' Iri' Jam. Jeju Cristo ma' iri na ne, an hwet mi' napari' pain ca xiram pa' capari' Iri' Jam. Mi' napari' pain ca querec pin' xin oro ca iri'o' wa con Iri' Jam quem.