Popular Bible Verses from རོ་མི། 12

Share

ན་ཧ་བ་ ཨོ་ཐ་འཛམ་གླིང་ག་ སོ་ངོ་བ་ད་བུ་ཨ་ཉི་མ་ཆོའི། དག་པ་ཀབ་ཉི་ ན་ཧ་མི་ཐང་ཁེ་པ་ དཀོན་མཆོག་ག་ སོར་པེ་བི་ཉི་ ན་ཧ་བ་ཤོ་ སོ་ངོ་སིང་མ་རི་ལེ་ཁེ༌ལེ། ཉི་ཤ་ ན་ཤི་དཀོན་མཆོག་ག་ ཐུགས་བཞེད་ལེག་པུ་དང་ ཐུགས་ཀ་ཚུད་ཁཱན་ ཉི་ཅོན་ད་སུ་རང་ མ་ཁཱན་ཁེ་པ་ སེ་ལེ་རེ༌བེ།

ཨོ་ཉི་ཨ་དེན་གེ་ ཇ་ག་ཡུང་ཟི་བ་ ཇི་གི་ན་ཧ་ཡེག་ཅ་ དཀོན་མཆོག་ག་ སྙིང་རྗེ་ཆི་ལུ་ཆོ་ཝ་ཨ་དེན་གེ་ ན་ཧ་ལུས་པུ་ཁེ་པ་ གསོན་པོ་ཨ་ཉི་ དཀོན་མཆོག་ག་ཏཱན་ མཆོད་པ་ཕུལ༌ཤོ། ཨུ་ཉུ་གི་ རོ་ཀ་ཕྱག་ཞུ་ལེ་དེན་གེ་ རོ་ཀ་ཐུགས་ཀ་ཚུད༌པེ། ཨུ་ཐུ་ཤོ་ ན་ཤི་ཏ་པེ་ཁེ་ཁཱན་ ཐུགས་ཉིད་ག་ཐུང་ཀེ་ཨ་ཉི་ གསོལ་ཝ་ཏབ་ཅ་གི༌ལ།

ན་ཤི་རེ་ཆ་ཨ་ཁཱན་ག་ ཤོ་ནང་ཕེ། དཀའ་ཝ་ཅཱད་པེ་གང་ཀ་ བཟོད་པར་སྒོམ༌ཅོ། ཉི་དུས་ཏ་བུ་རང་ སྨོན་ལམ་ཏབ༌ཅོ།

ངན་པ་གི་ཟག་པེ་མང་གི་ཝ་ ན་ཤི་ལེག་པུ་ཨ་ཉི་ ངན་པ་ཕ་མེ་ཁེ༌ལེ༎

ཡུང་ཟི་ནང་དོ་ ཕང་པ་པུརུས་ཀིན་ཨ་ཉི་ ན་ཧ་བ་ ཆམ་ཉི་ཆོ་ལེ་ཁེ༌ལེ། ཉི་རང་ཏེན་གེ་ལག་ཉི་ ཐུར་དང་ཐུར་ག་ཏཱན་ གུས་ཞབས་ཨའི།

ངོ་མ་ཨ་ཉི་ཕང༌ཅོ། ཉི་ངན་པ་ཁེ་པ་མ་ཟེས༌ཅོ། ལེག་པུ་ཁེ་པ་ ཙུང་ཉི་རང་ཐའི།

ན་ཤི་ཧབ་ཏུར་རེ་བ་ཐུར་ སོ་ངོ་ཐམས་ཅན་ཀབ་ཉི་རང་ཆམ་ཉི་ སྐྱིད་པུ་ཨན་ ཆོ་ལེ་མིག་པ་ཕི།

ཇ་ག་ཇ་རོ་བ་ ཧིང་འགྲམ་ཧ་ལ་རང་མ་ཐའི། དག་པ་ཀབ་ཉི་ དཀོན་མཆོག་ག་ཕྱག་ཀ་ཐའི། ཧང་ཡ་དག་ནེ་ལ་ གསུང་རབ་ནང་ཀེ་ཤོན་ཅ་ ཧིང་འགྲམ་ཤོ་ ཇི་གི་ཐ༌ལེ། ལོག་ཉི་ཏ་པེ་ཁེ་ཁཱན་བ་ཀ་ ཇི་གི་ཏ་པེ་དག༌ཉི་ གཙོ་བོ་གི་གསུངས་མ༌ཅ།

ཉི་སེམས་ཤོ་ཉི་ གཙོ་བོ་ག་ཕྱག་ཞུན་ཅ་ཨ་ཉི་ ཙ་དྲེག་ཉི་ལའི་ཨའི། ཉི་ཀ་ཤི་ ཧ་ལ་རང་མ་ཨའི།

དཀོན་མཆོག་གི་ ཐུགས་རྗེ་གཟིགས་ཉི་ ཇ་ག་གནང་མ་དང་ཏུ་ཉི་ ཇི་གི་ན་ཧ་ཡེག་ཅ་ ན་ཤི་མི་ལེ་ཁེ་ཝ་གེ་ལག་ཉི་ ན་ཧ་བ་ གནམ་མེད་ས་མེད་ ཆི་ལུ་ཅ་དག་ཉི་ ནའི་ཏེན་གི་མ་མི། ལག་ཏང་ རང་ཏེན་ག་ཀོར་གེ་མིན་ཅ་ཨ་ཉི་ རིག་པ་སྒྲིམ་ཉི་ དཀོན་མཆོག་གི་ ན་ཧ་དད་པ་ ཧབ་ཏུར་གནང་མ་ལ་སྨོ་ ཨུ་ཉུ་དང་ཏུ་ཉི་ ན་ཤི་ནའི་ཏེན་ག་ བརྟག་དཔྱད་ཕི་ཉི་གོད༌ཅོ།

ངན་པ་ཨ་ཁཱན་ག་ཏཱན་ ལོག་ཉི་ཧ་ལ་རང་ ངན་པ་མ་ཨའི། དག་པ་ཀབ་ཉི་ སོ་ངོ་ཐམས་ཅན་ག་གུབ་ཀ་ ལའི་ལེག་པུ་ཤ་ ཨ་ལེ་གོད༌ཅོ།

ཐུར་དང་ཐུར་ཀབ་ཉི་ ཆམ་ཉི་ཆོའི། ཆི་ལུ་རི་ལེ་མ་གོད་པཱན་ སོ་ངོ་ཉམ་ཆུང་བ་ཀབ་ཉི་ ཤོ་ནང་ཕེ་ཏོག་ཏོ་ཨ་ཉི་ཆོའི། ན་ཤི་རང་ཏེན་ཤ་ སེ་ཁཱན་གི་ལ་དག་ཉི་མ་མི།

ལག་ཏང་ གསུང་རབ་གེ་ ཤོ་ཝ་དང་ཏུ་ཉི་ ན་ཤི་ཨའི། ན་ཧ་དགྲ་བྱང་ཕིཤི་ བི་ནང་ཁུ་ཝ་ཆོ་ནེ་ལ་ རོ་ཀ་ལྟོ་བི། རོག་ཏེ་བ་ རི་ནང་སོ་ཕ་ཆོ་ནེ་ལ་ རོག་ཏེ་བ་ཀ་ ཧང་ཐུར་ཇ་མེ་ག་བི། ཉི་རོག་ཏེ་བ་ཀི་ ཨ་ཁཱན་ག་གོད་ཉི་ རོག་ཏེ་བ་ངི་ནང་ཁུ༌ལེ།

ན་ཧ་མ་ལེག་པ་ ཨ་ཁཱན་བ་ཀ་དེན་གེ་ བྱིན་རླབས་ཞུའི། རོག་ཏེ་བ་ཀ་ ཁ་རབ་ཕི་ལེ་མང་གི་ཝ་ རོག་ཏེ་བ་ཀ་དེན་གེ་ བྱིན་རླབས་ཞུའི། ཤོ་ནང་ཕེ་ཁཱན་བ་ཀབ་ཉི་ ཤོ་ནང་ཕེ་ཉི་ཆོའི། ཉི་གེབ་ཁཱན་བ་ཀབ་ཉི་ གེབ་ཉི་ཆོའི།

ཚཱས་ཁཱན་ དཀོན་མཆོག་ག་ སོ་ངོ་བ་ཀ་རུམ༌ཅོ། ཉི་ཤི་མིན་བ་ཀ་ཁབ་ཟང་ཨ་ཉི་ དྲང་མེ་ཕུལ་བེ་ག་ལམ༌ཅོ།

ཨ་ཧ་ལུས་པུ་ག་ དབང་པོ་མང་པུ་ཐུར༌ཅ། ཉི་དབང་པོ་ཐམས་ཅན་ག་ རང་རང་ས་ ལའི་ཆོ་ཝ་པུརུས་ཀིན་ཨ་ཉི་ ཁིརིས་ག་སྐུ་གཟུགས་བུ་ ཨུ་ཉུ་པུརུས་ཀིན་རང་གི༌ལ། ཨའི་ཐམས་ཅན་རང་དོབ་ཉི་ རོ་ཀ་སྐུ་གཟུགས་ཅོད་ཅ་གི༌ལ། ཉི་ཨའི་ཐམས་ཅན་རང་ ཐུར་དང་ཐུར་ག་གི༌ལ།