Popular Bible Verses from မက 13

Share

ကူပ် ညှိုမ် ဘေ ဒီ အုဝ်၊ ဂေ ဒူအီ ဒွန် အီ ဒီ ဘော ဇွင့် ဘေ။ အာဆေ ယီ မိုဝ်း နဝ်း မန် ဘော ခမ် တူတ့် ဒွန် မျုဝ်၊ တဲး န့ ကော ဇမ် ပန် ဒီ တူတ့် ဇာတ် တီ၊ ဇဝ်ဖြာ ဒီ ချွတ် အာဆာက် အန်။

တဲး ဘေ ဆာဒိက်၊ ဆာခိုဝ် ဘော ဘ်ု ပန် မှဝ် န့ ဒီ ဇမ် အာခြာဝ် အန်။ ခုဝ်၊ ဘေ တူ နပ် ပန် မှဝ် အာခြာဝ် အန် ဒီ တး။

ဆေ ဂေ ဒီ မှေတ့် ဘေ၊ ဝီ တဝ်း ဒီ ဆုင်ဖျာတ် အာမူ ဘေ၊ ဘေ ကွဲ့ တဲး နဝ်း ဘေ ကာဟွာ့၊ ကွဲ့ ဇေန့်ဇာ ဒီ အာတ့် ဂြုဝ်း ပီ ဒီ ကာလာင် ဘေ။ ဆေ ဟီ ဇမ် အာခြာဝ် အန်၊ ဘေ လုဝ် ကာလာင် ဂြုဝ်း အီ လိုပ် ခဲင် နဝ်း ဘေ။ အာတီ အာဝ် မုး ဂြုဝ်း ဘေ။ နဝ်း ဖွိုမ် ဇဝ်ဖြာ ဒီ ဟပ် ဂြုဝ်း အန် ခဲင် နဝ်း ဘေ။

ဘော ဘ့လေန့် ဘော ကာဒါယ် ဒီ ဟြာယ် တူတ့်။ ဂြုဝ်း ပီ ကာလာင် အုဝ် ယီ တူ ဟြာယ် ဒေါ မှဝ်။ န့ ဒီ ကွယ် ဆေဆေ။

အာဝ် မိုဝ်း အာဆေ၊ အီ နပ် ဆီချာ လွင် ဆီငဲ အန်၊ နာရီ အန်၊ ပန် ဒီ ဝီ တး အုဝ်။ ဘော ဂေ အာမူ အာမာတ် ဇဝ်ဖြာ၊ အီ ကွယ် ဂါင်ဟြာဝ်၊ ဘော ဂွန် ဇဝ်ဖြာ မိူဝ် တူ နပ်။ မီ ဇဝ်ဖြာ ဟဲ့ နပ် ဒေါ မှဝ် န့ ဒီ ဘဲန် ပီ တဝ်း အုဝ်။

ဆေ ဘေ ဘော ထူမ် ဆာဒါင် လွင် ဒူအီ လာယ် ကာဂုဝ်း၊ ကွဲ့ တဲး ဘေ ယုဝ်။ န့ လုဝ် ဘဲန် ဇိုဝ် တီ ဒွန် မျုဝ်။ ဒေါ အန် တီ ယီ ညှမ် ဇမ် အာခြာဝ် ဒီ တူတ့် ဒွန် မျုဝ်။

ပါယ် တီ ဘော ဘေ လုဝ် ဘ်ု ဆာဒိက် ဆေဆေ၊ ကူပ် တူ နပ် ဘေ ဒေါ မှဝ် အန် ဇဝ် ဒီ တး။ ယုဝ် အန် ဒီ တး ဘာ ဒီ အပ်၊ ယုဝ် အန် တး ကာတဲ ဆွိုမ်၊ ယုဝ် အန် ဒီ တး ဒေါ ကာတွုန် အျီန်၊ ယုဝ် အန် ဒီ တး ဘာင် ဒီ ဝး၊ ဘေ တူ နပ်။ ကွဲ့ တဲး ဘေ အိတ် ဒေါ တး အန်။ ပီ တဝ်း အုဝ် ဒီ ဘေ၊ အုဝ် ဘော တဝ်း၊ တဲး ဒူအီ ဒွန် အီ ထူမ်။ ဘေ လုဝ် ဘ်ု ဆာဒိက်။” ခဲ့ တီ ဇဝ် ယေဆူ ကာလာင် လွင် အာခြာဝ် ဒီ တး။

န့ ဒီ မိုဝ်း ဒူအီ ဘဲန် မျုဝ် ဘဲန် မျုဝ်၊ ဒီ လာယ် ဘဲန် ရန်ဆူ။ ဘော ခုန်ဒီခမ် အူ ကာဒင် ဒီ ဝီ ကာဂုဝ်း ဒီ ခုန်ဒီခမ် ပေါ အူ ကာဒင်။ ဘော မာအိမ် ဒီယေန့် ဘဲန် ပ့လုဝ့် ဘဲန် ပ့လုဝ့်။ ဂေ ဒူအီ ဒီ ဘော အေတ့် ပီ ဒီ ဟူမ်။ ဆေ ဒူအီ ကာဒုး ဒုက် ဇိုဝ် တီ ဒွန် မျုဝ်၊ န့ ဒီ ပီ အီဘိုန့် ဆဝ် ဒီ မိုဝ်း ဂွန်။

အာတ့် အန် တီ၊ ဂေ ဒူအီ ယီ လုဝ် ဟာဝ် ဒွန် နာ ဒွန် ပ့လုဝ့် ကာလာင် ဒါရာ ဇဝ်ဖြာ အီ တဲး ဒူအီ ဘဲန် နဝ်း ဒါခိုယ်၊ တဲး ဒူအီ ဒွန် မျုဝ် ကော နပ် လွင် အန်။

န့ ဒီ မိုဝ်း ဘဲန် ဝီ ဘဲန် ဝီ၊ ဂေ ဒီ တး ဂါဝ် စိူဝ် အုဝ်။ ဂေ ဒီ ဘော တဝ်း၊ ဂေ ဟဲ့ မုး အုဝ်၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ပါယ် တီ ဂေ ဒူအီ ကိူန် ဒီ ကာလိုပ် ဒီ ညှိုမ် ဂြုဝ်း ပီ ကာလုဝ် ဂေ။

ဘေ ဘော လုဝ် ဆာဒိက်။ ဂေ ဒီ အာပ် ဘော ဘေ ဒီ ဒါ တာင် အီ အိုပ် မိူင်။ ဂေ ဒူအီ အာယူဒါ ဒီ ဘော မး ကာဆဝ် ဘေ ခဲင် ဇူင် ဂေ။ ကူပ် ညှိုမ် ဘေ ဒီ အုဝ်၊ ဘေ ဒီ ကွယ် ဒီ အာတ့် ဒါ ကာညာ ဘော ခုန်ဒီခမ် အီ အိုပ် မိူင်၊ တဲး ဘေ ပွိုန် ဒီ ကာလာင် လွင် အုဝ် ဒီ ဂေ။

န့ ဒီ မိုဝ်း ဒူအီ၊ ဂေ ကာလုဝ် တဝ်း၊ ဂေ မုး ဒူအီ ဒီ ချွတ် အာဆာက် အီ။ ဂေ ဒီ ဘော ကာလုဝ် ဒီ တဝ်း၊ ဂေ မုး ဒူအီ အီ ဘျာန် ဂြုဝ်း ဇဝ်ဖြာ။ ဂေ ဒီ ဘော ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။ ဂေ ဒီ ဘော ထေဝ် ဒီ ကာလုဝ် ဒီ ဒူအီ ပီ ရဝ်း ဇဝ်ဖြာ။ ဂေ ယီ တူ ပဲ ဒီ ဘူင် တဲး ဂေ ဒူအီ ပီ ရဝ်း ဇဝ်ဖြာ ညှိုမ် ဂြုဝ်း ပီ ကာလုဝ် ဂေ တီ။

ဝါယ် အန် တီ ဂေ ဒူအီ ဒဲင် ကာဒါယ် ဟီ ဟွတ့် ခမ် ဒုက် တာင် ဇိုဝ် တီ၊ ဘော ဆီငဲ ဒီ အပ် ဝွင့်။ ဘော မာဂျီန် အာဝ် ဟူ မိုဝ်း ဘ့လာင် အန်။ ဘော ဆီမန့် ဒီ ရး စုဝ်း ခဲင် ဘ့လေန့်။ ဘော ပွုန် အီ တဲး ဆီမန့် ကွယ် ဒဲင် ဘ့လေန့်၊ အာဝ် ဟူ ပီ ဘြိမ်၊ တဲး န့ ဒီယုး တူတ့်။