Popular Bible Verses from GENESIS 9

Share

Ma tha God ka una eri, Fafuilalaa nai nia ana alaofua eri na nau ku kania imaalutaku, ma ni kamulua, ma do maruki eki sui bana na ni isamulua, sulia unii wane na ni ki u toto si sui. Nau kwai alua fulaaro nau asi datha, ṉa fafuilalaa neri ana alaofua eri na kera kania imaalutaku ma fanua na i iano.

Ma fulaaro kai to bana i lala si datha; ma ni nau kwai lio uria, fasi kwai onotoona alaofua eri na kai toto si sui, na kera kania imaalutana tha God ma do maruki‐ki sui bana seeda ka to bana i fanua na i iano.

Ni tei bana ne adea ’abuna imole kai igwa, imole kai duua ana ’abuna imole eri ne ilia: uria na sulia nuuna tha God nia e thauwai ana imole.

Ma tha God ka alua lea la fafia tha Noa ma kaluwane nia ki, ka una eri isada, Kwalafamulua keki oro faamau ka lae alaa, ma muki faafuṉua fanua na i iano.

Si do ki sui bana na keki isu ma keki maruki bada, do eki na ṉa faṉa ifamulua; ’uria fale la na nau ku fale iamulua na ba ana kaala kwake, nau ku falea naa si do ki sui bana iamulua.

Ma mau la uri kamulua, ma aanu la uri kamulua, kai to fafia do maruki eki sui bana i fanua na i iano, ma fafia thaaro eki sui bana i mamaṉaa, ma fafia do eki sui bana na ka isu i fanua na i iano, ma fafia gwa i’a eki sui bana i la amali; nau ku falea naa do eki sui boo i abamulua.

Ma ni kamulua, kwalafamulua keki oro faamau ka lae alaa; muki tharea wela oro ki i fanua na i iano, ma muki oro faamau iei.