Popular Bible Verses from ᤕᤢᤜᤢᤴᤏᤠ 14

Share

“ᤀᤡᤱᤃᤠ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤏᤢ ᤐᤰᤌᤠᤱᤗᤥ. ᤀᤠᤛᤏᤠᤖᤢᤱᤅᤡᤴ ᤂᤡᤏᤡ᤹ ᤐᤡᤏᤡᤱᤗᤥ॥ ᤁᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤧᤒᤡᤖᤡᤒᤠ ᤜᤧᤰᤁᤣᤃ ᤔᤧᤒᤡᤏᤡᤱᤅᤡᤴᤗᤥ॥ ᤂᤡᤏᤡ᤹ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥

ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤗᤠᤶ. ᤛᤧᤰᤂᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤡᤱᤃᤠ᤹ᤀᤣᤖᤥ॥ ᤀᤠᤳᤋᤡᤴᤏᤠᤱ ᤀᤡᤱᤃᤠ᤹ ᤔᤧ᤺ᤴᤏᤣᤃ ᤐᤠᤏᤢᤍᤡᤱ ᤐᤠ᤺ᤸᤗᤥ ᤁᤧᤵᤔᤠ ᤔᤧᤛᤢᤰᤏᤧᤴᤗᤥ॥

ᤕᤧᤛᤢᤖᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤀᤠᤱ ᤕᤠᤵᤔᤡ ᤏᤛᤠᤴ ᤀᤠᤈᤥᤃᤧᤶᤔᤧ᤹ᤀᤥ॥

ᤁᤖ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤔᤡᤱᤅᤥ ᤐᤠᤱᤔᤠ ᤀᤡ᤺ᤳᤋᤢᤒᤠ ᤁᤢᤓᤠ᤹ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤧᤜᤢ᤹ᤖᤡᤀᤠᤱ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤛᤥᤀᤥ ᤋᤠᤖᤢ ᤁᤧᤒᤡᤖᤡ᤹ᤖᤥ॥

ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤂᤧᤵᤛᤢᤀᤠᤱ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤀᤡᤱᤃᤠ᤹ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤧᤱᤃ ᤒᤠ ᤂᤧᤴᤏᤣᤖᤥ॥ ᤜᤠ᤺ᤳᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠ ᤂᤧᤱᤃ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤗᤢᤱᤔᤠ᤹ ᤋᤢᤰᤋᤢ᤹. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤢᤱᤅᤠᤱ ᤂᤧᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤅᤠᤖᤥ॥”

ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤴᤏᤢ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤃ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤖ ᤑᤠ᤹ᤀᤠᤱ ᤘᤣ᤹ ᤁᤢᤓᤠ᤹ ᤁᤧᤒᤡᤒᤠᤎᤡᤰ ᤁᤧᤒᤡᤖᤡ᤹ᤖᤥ॥ ᤂᤢᤏᤧ᤹ᤃ ᤁᤠᤰ ᤛᤧᤰᤂᤠᤀᤥ ᤗᤠᤶᤃᤧᤗᤥᤒᤠ ᤛᤣᤛᤣᤔᤠᤱᤗᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤥᤔᤠ ᤔᤧᤴᤇᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤴᤏᤡᤛᤢᤴᤏᤠᤱ ᤁᤢᤛᤡᤱᤅᤠᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤁᤖ ᤂᤡᤏᤡ᤹ᤃ ᤂᤢᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗᤥ ᤂᤢᤏᤧ᤹ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹ ᤜᤧᤰᤁᤩᤠᤱ ᤁᤧᤍᤠᤒᤠ ᤕᤧᤶᤔᤥᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤘᤠ᤹ᤖᤥ॥

ᤂᤡᤏᤡ᤹ ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠᤱᤛᤥ ᤁᤢᤛ᤻ᤛᤠᤀᤥᤗᤠᤶ ᤀᤥᤛᤣ᤺ᤴᤍᤠᤱ ᤐᤥᤱᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤴ ᤆᤥᤃᤢᤱᤗᤥ॥ ᤀᤡᤱᤃᤠ᤹ ᤀᤠᤔᤡᤱᤅᤥ ᤌᤣ᤺ᤴ ᤁᤧᤏᤠ᤺ᤰᤋᤢᤶᤛᤠᤱ ᤂᤧᤴ ᤀᤡᤱᤃᤠ᤹ ᤆᤥᤃᤢᤱᤗᤥ॥

“ᤀᤡᤱᤃᤠ᤹ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡ᤹ᤏᤧ ᤑᤠ᤹ᤃᤪ ᤀᤠᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥

ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤡᤶᤔᤥᤃ ᤕᤖᤡᤰ ᤕᤠᤰᤑᤠᤱᤜᤠ᤹ ᤔᤧᤏᤧ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤕᤢᤱᤍᤧᤴ ᤕᤠᤖᤡᤵ ᤆᤥ᤺ᤰᤛᤧ ᤐᤣ᤺ᤰᤁᤠᤖ ᤐᤳᤋᤠᤖᤥ॥ ᤂᤧᤴ ᤜᤥ᤺ᤵᤋᤧᤸᤗᤧᤃ ᤀᤡᤱᤃᤠ᤹ ᤜᤧᤰᤁᤣ ᤔᤧᤔᤧᤳᤏᤡᤱᤅᤡᤶᤒᤠ ᤘᤕᤧᤖᤥ॥

ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤣ᤺ᤰᤁᤠᤀᤠᤱ ᤂᤡᤏᤡ᤹ ᤗᤠᤃᤡ ᤕᤢᤱᤍᤧᤴ ᤕᤠᤖᤡᤵ ᤆᤥᤃᤢᤱᤅᤠᤱ ᤕᤠᤶᤔᤥ ᤕᤢᤀᤠ ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤋᤣ᤹ᤏᤡᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤳᤋᤡ ᤘᤠ᤹ᤀᤠ ᤂᤧᤵᤔᤥ ᤂᤡᤏᤡ᤹ᤀᤠᤱ ᤁᤧᤘᤕᤡ᤹ᤖᤥ॥

ᤌᤥᤔᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣ᤺ᤰᤗ ᤁᤧᤒᤳ ᤂᤧᤴ ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤴ. ᤜᤧᤰᤁᤣ᤺ᤸᤗᤧ ᤀᤠᤏᤡᤃᤣ ᤂᤧᤴ ᤗᤠᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤒᤣ᥅”