Popular Bible Verses from ᤋᤥᤗᤡᤱᤛᤥᤔᤢ 49

Share

ᤕᤜᤢᤍᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤜᤠᤱᤋᤰᤁᤠ᤺ᤳᤋᤡᤴ ᤔᤧᤗᤧᤳᤏᤧᤸᤗᤥ. ᤁᤢᤴᤍᤠᤱᤒᤧᤴ ᤔᤧᤴᤍᤠᤀᤣ ᤌᤠᤖᤡᤰ ᤜᤠᤱᤈᤢᤶᤔᤥ ᤀᤥᤃᤵ ᤁᤧᤒᤥᤱᤒᤠ ᤋᤰᤁᤠ᤺ᤳᤋᤡᤴ ᤁᤢᤗᤠᤱᤓᤡ᤺ᤵᤔᤥᤗᤠᤶ ᤔᤧᤈᤳᤏᤧᤸᤗᤥ॥ ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤂᤧᤶᤔᤠ ᤁᤧᤍᤧᤶᤒᤠ ᤔᤧᤒᤥᤱᤗᤥ॥

“ᤕᤢᤛᤢᤑᤧᤴ ᤁᤢᤈᤠ᤹ ᤀᤡᤛ᤻ᤛᤣ᤺ᤱᤒᤠ ᤀᤡᤘᤠ᤺ᤳᤗᤥ. ᤘᤒᤢᤴᤍᤠᤰᤁᤡᤸᤗᤧ ᤁᤢᤒᤣᤛᤠᤱᤒᤠ ᤁᤢᤈᤠ᤹ ᤁᤧᤒᤵᤐᤠ ᤁᤢᤀᤡᤘᤠ᤺ᤳᤗᤥ. ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ ᤗᤢᤱᤎᤠᤰ ᤆᤱ ᤜᤧ᤹ᤕᤥ ᤋᤠᤵᤐᤣ᤺ᤰᤗᤥ॥ ᤋᤥᤱ ᤗᤡ ᤁᤧᤕᤠᤱᤒᤠᤜᤠ᤹ᤖᤧ ᤂᤧᤴ ᤛᤠ᤹ᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤖᤥ. ᤂᤧᤴ ᤋᤥ᤺ᤱᤅᤡᤸᤗᤧ ᤔᤧᤀᤠᤒᤢ. ᤜᤧᤰᤁᤩᤠᤱ ᤂᤧᤴ ᤔᤧᤏᤠ᤺ᤳᤋᤢ॥

ᤜᤧᤰᤁᤣᤛᤠᤱ ᤂᤧᤸᤗᤧ ᤁᤢᤗᤡᤴ ᤁᤧᤈᤠ᤹ᤒᤠᤀᤣ ᤆᤥᤃᤧᤖᤥ. ᤜᤧᤰᤁᤩᤠᤱ ᤁᤢᤜᤢᤰᤜᤠ᤹ ᤁᤧᤎᤢᤶᤒᤠᤀᤣ ᤐᤥ᤺ᤰᤂᤧᤖᤥ. ᤕᤠᤁᤢᤒᤖᤧ ᤔᤢᤰᤛᤠᤶᤛᤠᤒᤧᤸᤗᤧ ᤁᤢᤜᤢᤰᤁᤡᤸᤗᤧ ᤆᤥᤃᤢᤸᤗᤧ. ᤀᤡᤛᤪᤠᤀᤡᤗᤒᤠ ᤕᤠᤰᤐᤣ᤹. ᤔᤧᤸᤗᤢᤰ ᤁᤶᤒᤠᤸᤗᤧ ᤆᤥᤃᤢᤸᤗᤧ. ᤀᤡᤃᤪ ᤂᤧᤏᤧ᤹ ᤁᤧᤓᤠ᤹ᤒᤠᤱ ᤁᤧᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤂᤢᤏᤧ᤹ ᤁᤧᤓᤠ᤹ᤖᤥ. ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ. ᤂᤢᤏᤧ᤹ ᤂᤧᤏᤧ᤹ ᤜᤠᤱᤘᤠ ᤔᤢ᤹ᤀᤡᤛᤠᤶ ᤁᤧᤒᤡᤖᤥ— ᤌᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹. ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤒᤢᤴᤜᤠ᤹ᤀᤥᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹. ᤏᤢ ᤜᤧᤰᤁᤩᤠᤱ ᤛᤠᤵᤐᤥ᤺ᤰᤁᤥᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹॥

“ᤕᤜᤢᤍᤠᤀᤣ. ᤁᤧᤶᤓᤢ᤹ ᤁᤧᤴᤛᤠ᤹ᤛᤡᤖᤧ ᤂᤧᤏᤧ᤹ ᤁᤧᤏᤠᤖᤠ ᤔᤧᤓᤥᤛᤢᤖᤥ. ᤁᤧᤜᤢᤰᤁᤡᤸᤗᤧ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤛᤡᤳᤗᤠ ᤕ᤹ᤖᤢᤖᤥ. ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤛ᤻ᤛᤠᤜᤠ᤹ ᤂᤧᤏᤧ᤹ ᤁᤧᤍᤃᤡ ᤛᤠᤶᤒᤥᤴ ᤜᤒᤳ ᤔᤧᤒᤳᤗᤥ॥ ᤕᤜᤢᤍᤠᤴ ᤌᤧᤖᤡᤱᤒᤧᤸᤗᤧ ᤁᤢᤛ᤻ᤛᤠᤖᤥ. ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤛᤠ ᤁᤧᤏᤠ᤺ᤳᤋᤢᤀᤠᤱ ᤁᤧᤏᤢ᤺ᤰᤂᤧ ᤁᤧᤍᤧᤀᤠᤱ ᤁᤧᤘᤠ᤹ᤖᤥ. ᤌᤧᤖᤡᤱᤒᤧᤴ ᤜᤧᤰᤁᤣ ᤂᤧᤴ ᤌᤡᤱᤛᤡᤱᤅᤠᤱ ᤏᤧᤖᤥ. ᤌᤧᤖᤡᤱᤔᤧᤴ ᤜᤧᤰᤁᤣ ᤜᤠ᤺ᤳᤗᤧ ᤂᤧᤴ ᤑᤥᤱᤔᤠ ᤁᤥ᤺ᤳᤋᤢᤒᤣ᥅

“ᤖᤢᤒᤧᤴᤏᤣ. ᤂᤧᤏᤧ᤹ ᤀᤠᤱᤃᤠ᤹ ᤋᤢᤶᤒᤠ ᤀᤠᤛ᤻ᤛᤠᤏᤧᤖᤥ. ᤀᤠᤔᤢᤰᤛᤠᤶ ᤏᤢ ᤀᤠᤛᤠ᤹ᤀᤡᤖᤧ ᤋᤃᤡᤒᤠ ᤀᤠᤛ᤻ᤛᤠᤏᤧᤖᤥ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧ᤺ᤰᤐᤠᤏᤧᤖᤥ॥ ᤆᤫᤠ᤺ᤳ ᤜᤧᤰᤋᤱᤒᤠ ᤂᤧᤏᤧ᤹ ᤁᤧᤗᤧ᤺ᤱᤒᤠᤀᤠᤱ ᤁᤧᤘᤠ᤹ᤒᤠᤏᤧᤖᤥ. ᤁᤧᤔᤡᤱᤛᤥ ᤁᤧᤎᤠᤱᤛᤥᤖᤧ ᤁᤧᤴᤍᤰᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤀᤡᤵᤏᤠᤀᤥ ᤁᤧᤗᤠᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣ᤺ᤳᤋᤧᤴᤏᤢ ᤁᤧᤀᤡᤵᤛᤧ. ᤜᤧᤰᤁᤩᤠᤱ ᤂᤧᤴ ᤀᤠᤛᤢᤳᤌᤥ ᤁᤧᤈᤥᤃᤢᤖᤥ॥