Popular Bible Verses from ᤋᤥᤗᤡᤱᤛᤥᤔᤢ 3

Share

ᤔᤧᤴᤇᤢᤔᤠ᤺ᤸᤗᤧ ᤂᤧᤴ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤀᤡᤴ ᤆᤠᤔᤠᤸᤗᤧ ᤏᤢᤒᤠ ᤁᤧᤒᤥᤱᤒᤠ ᤏᤢ ᤀᤥᤔᤧᤵᤔᤧᤸᤗᤧ ᤏᤢᤒᤠ ᤏᤡᤃᤧᤎᤠ᤺ᤵᤐᤠ ᤜᤧᤰᤁᤩᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤂᤧᤴ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤀᤡᤴ ᤆᤠᤔᤠ ᤁᤧᤒᤥᤱᤒᤠ ᤏᤡᤛᤢ. ᤜᤧᤰᤁᤩᤠᤱ ᤂᤧᤴ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤀᤡᤴ ᤋᤢᤒᤢᤀᤠᤱ ᤆ. ᤂᤧᤒᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤘᤠ᤹ᤒᤠ ᤁᤢᤕᤧ᤺ᤶᤒᤠ᤺ᤴᤏᤠᤱ ᤐᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤆ॥

ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤛᤡᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ᤀᤥ ᤀᤛᤣ᤺ᤰᤁᤧᤴ ᤁᤧᤖᤧᤰᤏᤢ᤺ᤸᤗᤧ ᤁᤢ᤹ᤀᤡᤃᤧᤓᤧᤶᤒᤠ ᤆᤥᤃᤧ॥ ᤂᤧᤸᤗᤧ ᤔᤧᤴᤇᤢᤔᤠᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤱᤛᤣ᤹ᤀᤡᤰᤁᤥᤒᤠ ᤛᤡᤱᤒᤢᤱᤜᤠ᤹ᤀᤥ ᤁᤧᤎᤥ᤺ᤰᤐᤠ ᤀᤠᤳᤋᤡᤴ ᤛᤡᤱᤛᤣᤴ ᤔᤧᤈᤧᤛᤧᤴᤏᤧ᤹ ᤑᤠ᤹ᤀᤠᤱ ᤁᤧᤔᤧᤳᤋᤧᤇᤡᤀᤠᤱ ᤘᤠ᤹ᤒᤡ᥅”

ᤂᤧᤏᤧ᤹ ᤏᤢ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤢᤶᤔᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠ ᤏᤢ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤗᤢᤶᤔᤥ ᤏᤡᤱᤔᤡ ᤐᤠᤴ ᤁᤣ᤺ᤳᤋᤢᤱ ᤐᤡᤏᤧᤛᤡᤱᤗᤥ॥ ᤂᤧᤸᤗᤧ ᤁᤧᤎᤣᤃᤣ᤺ᤰᤁᤡᤴ ᤕ᤺ᤵᤛᤢ ᤁᤧᤒᤡᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤸᤗᤧ ᤁᤢᤗᤠᤱᤃᤠᤰᤌᤡ᤺ᤶᤒᤧᤴ ᤁᤧᤀᤃᤢ ᤁᤧᤒᤡᤖᤢ᤹॥”

ᤂᤧᤒᤩᤠᤱ ᤔᤧᤴᤇᤢᤔᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤛᤠᤃᤵᤔᤠ ᤋᤢᤱᤅᤡᤴ ᤀᤠᤱᤃᤠ᤹ ᤆᤠ᤹ᤖᤡᤰ ᤑᤥᤛᤢᤱ ᤐᤡᤏᤧᤖᤥ. ᤐᤛᤠᤰ ᤛᤠᤰᤗ ᤀᤅᤧ᤺ᤰᤘᤠ ᤛᤠᤃᤧᤘᤠ᤺ᤴᤍᤢ᤹॥ ᤂᤧᤏᤧ᤹ ᤁᤧᤏᤡᤱᤘᤠ᤺ᤴ ᤁᤧᤕᤧᤶᤒᤠ ᤗᤧᤵᤔᤠᤱ ᤐᤳᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤕᤢᤰᤁᤥ ᤂᤧᤏᤧ᤹ ᤁᤧᤃᤳᤗᤥ॥”

ᤂᤠᤶᤔᤥ ᤔᤧᤴᤏᤢ᤺ᤱ ᤔᤧᤶᤒᤣ᤺ᤰᤁᤣ ᤌᤠᤖᤡᤰ ᤁᤧᤍᤫᤠᤒᤥ ᤁᤧᤜᤥ᤺ᤶᤒᤪᤡᤰᤘᤠ ᤛᤧᤖ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤁᤢᤈᤠ ᤁᤧᤈᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤂᤠᤶᤔᤥᤗᤠᤶ ᤗ᤺ᤵᤔᤏᤠᤀᤠᤱ ᤁᤧᤘᤕᤧ. ᤂᤧᤏᤧ᤹ ᤂᤠᤶᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤂᤠᤶᤔᤥᤀᤣ ᤁᤧᤏᤢ᤺ᤱ ᤁᤧᤒᤣ᤺ᤰᤗᤥ॥”

ᤂᤧᤴ ᤀᤣᤃᤠᤱ ᤀᤠᤍᤶᤔᤧᤴ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤔᤧᤸᤗᤡᤱᤃᤧᤴ ᤁᤧᤔᤣ᤺ᤳᤋᤡᤸᤗᤧ ᤁᤢᤒᤠ᤺ᤴᤏᤡᤴ ᤁᤧᤄᤧᤵᤛᤢᤀᤠᤱ ᤔᤧᤴᤈᤠᤀᤥ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤏᤧᤒᤠ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤀᤡᤴ ᤁᤧᤈᤒᤠᤸᤗᤧ ᤆᤥᤃᤢᤸᤗᤧ. “ᤂᤧᤏᤧ᤹ ᤁᤧᤈᤥᤃᤢᤸᤗᤧ ᤂᤠᤶᤒᤣ᤺ᤰᤔᤥ ᤛᤠᤱᤃᤪᤠ ᤔᤠᤱᤍᤣ ᤌᤩᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤁᤧᤜᤡᤱᤜᤡᤱ ᤋᤢᤰᤂᤣ ᤁᤧᤈᤥᤃᤢᤀᤠᤱ ᤂᤧᤸᤗᤧ ᤑᤳᤇᤢᤒᤠ ᤁᤢᤈᤠᤴ ᤁᤧᤈᤖᤥ॥

ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤗᤧᤰᤆᤠ᤹ᤒᤢᤎᤢᤰ ᤁᤧᤘᤠ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤧ᥅ ᤔᤧᤈᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤏᤧᤒᤠ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤀᤡᤴ ᤁᤧᤈᤒᤡ᥅”

ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤴ ᤗ᤺ᤳᤋᤢᤍᤣᤛᤢᤀᤠᤱ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤡᤴ ᤁᤥᤔᤠᤖᤧ ᤗᤠᤃᤡ ᤀᤍᤏ ᤛᤡᤱᤛᤣ᤹ᤀᤡᤰᤁᤧᤸᤗᤧ ᤏᤠᤶᤃᤧᤴ ᤐᤡᤛᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤁᤧᤖᤧᤰ ᤐᤡᤛᤠᤱ ᤁᤧᤀᤡᤒᤠᤀᤠᤱ ᤁᤧᤘᤠ᤹ᤒᤠ ᤔᤡᤎᤢᤱ ᤔᤡᤖᤠ᤺ᤰᤗᤧᤴ ᤋᤠᤓᤣ ᤕᤧᤵᤛᤢ॥

ᤀᤠᤍᤶᤔᤡᤸᤗᤧ ᤁᤢᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤜᤘᤠ ᤔᤡᤱ ᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤔᤠ ᤂᤢᤏᤧ᤹ᤀᤣᤖᤥ॥