Popular Bible Verses from MATEO 7

Share

Diosta mañaichi, Paica carangallami. Mascaichi, taringuichimi. Punguta huajtachinguichi, Paica pascangallami.

Diosta tucui mañajcunaca japingami, mascajpash taringami, punguta huajtachishpapash pascajpi yaicungami.

Ñuca yachachishca cai shimicunata uyashpa, cazuj runataca, aligutapacha yarishpa paipaj huasitaca, rumi jahuapi huasichij runahuanmi chimbapurasha.

Shuj gentecuna imatapash aliguta cangunaman rurachun munashpaca, chashnallatami cangunapash shujcunaman aliguta rurana canguichi. Mandashca shimipipash, profetacuna villashca shimipipash chashnallatami mandajun.

Ashtahuangarin causaita causangapa yaicuna punguca quichijimi, ñambash quichijimi. Shina cajpimi, huaquingunalla tarinajun.

Quichiji pungutami, yaicuna canguichi. Chingaita chingaiman pushajuj punguca anchomi, ñambash anchomi. Chaitaca, ashtaca gentecunami yaicushpa rinajun.

Cangunaca, na alicuna cashpapash, huahuacuna mañajpica imatapash aligutami caranata yachanguichi. Jahua pachapi cangunapaj Taitacarin, Paita mañajcunamanga, ¿nachu ashtaca alicunata caranman?

Pitapash, ama chashnapachami ninguillachu, chaimi candapash na chashnallata ninga. Chashnapachami nishpa can imashnami llaquichingui, chashnallatami candapash llaquichinga. Shujcunata imata rurajpipash chashnallatami cangunamambash Diosca tigrachinga.

Ashtahuangarin, maijan cashpapash, Ñuca yachachishca cai shimicunata uyashpapash na cazuj runataca, t'iyu alpapi huasichij, juizu illaj runahuanmi chimbapurasha.

Cambaj huauquipaj ñavipi uchilla jupa tiyajujtara ricungapa randica, ¿imashpata cambaj ñavipi caspi tiyajujtara, na tigrashpa ricungui? Cambaj ñavipi shuj jatun caspi tiyajujtara nara anchuchishpaca, ¿imashnata cambaj huauquipaj ñavipi uchilla jupa tiyajujtara anchuchi ushanguiyari?

Llullashpa villaj profetacunamandaca, anchurinami canguichi. Paicunaca, llamashna ali ricurishpapash, shungu ucupica shuhuanata yachaj millai atujcunashnami. Ima cajpipash grano fucushcata ricushpami rijsi ushanguichi. ¿Uvacunataca, casha yuramandachu pallan? Na cashpaca, ¿higocunatapash cashapi fucushcatachu pallan?

Tucui ali yurapica, juyaillami fucun. Ashtahuangarin na ali yurapica, ima alipash na fucunllu.

Ali yurapica, imapash na alica na fucunllu. Shinallata, na ali yurapipash ima alipash na fucunllu.

Na ali fucuj yuracunataca tucuillami cuchushpa ninapi shitan.