Popular Bible Verses from Mateo 10

Share

—Rrehe tibodideni uatome-manarri! Oua tiadeni zosse onabaqquirrarope pina eueue zomarri panauiuarri tiadeni zosse onabaqquirrarossa narraro. Rraui tirrarizaniuarripe madirra tiadeniza uadiqquiri naui carri taui. Nema nezape tinoccodeni panarri. Pina macca nocco panarrarissa tiquenarri. Naraha tiadenipe tedimana terrerana, pina ococo rrone tarrarossa tiquenarri, onarraro.

Madirrapa pocca madie ouaza eccorezape poua inanazoqque-manaraha camittehe rriquerreraniccape carrizanapouitoui. Naraha madirra ouaha pocca madie ouaza acco taza arrirraro namiza madizanapouiuarrine touinira nazapa zoqqueuitoui. Zoqquezapa camittehe rriquerreranicca carri-rrarauitoui −nade Zeso.

—Nazama otauimariza tiquerrenarrarorrinepe madirra tiadeni tonarricabaqquiuiuarrine touini quenaraha narrarideni noppinedenipe ticappinemana terrerarri. Narraridenipa timedeni rricaniuarrine parriremanaraha niza tirricani nattinipe arri rrororoni rriquerreraniuarri ticorimedeni ua tozimabaqquiuiuarrine ssamoqquiri nauitoui. Deona tiadeni tonarricabaqquiuiuarrine parrireui. Arri rrororoni rriquerreraniuarri ticorimedeni ua tozimabaqquiuiuarrine naco parrireui. Nazama Deo noppinena ticappinemanarri, onarraro −nade Zeso.

Madirra ouaza damera tarrarazapa occa madirra torrauiuarrine parrire-rraraui. Occa madirra torrauiuarrinepa otauimarirrine ocasserani inauaneraha nema nehe otauimarizara damera tarrari. Pouaza: “Aua porimacossaniza tia inanazoqquena” quenaza naco poua attipa: “Peperriua ozoqquena. Zeso onebo-rraraui” nazapa narrarina occa madirra torrarrari.

—Madirra orrariapa madirra ouaha mittemanauiuarrine poua cacomeraza: “Ouape Zesocca madirra orrani” nazapa manaco ouape occa Abi Deo memeuarri madirrariza ouacomeranitoui: “Arrarrari madirrapa occa torraui” onanitoui. Naraha madirrapa madirra ouaha mittemanauiuarrine poua cacomeraza: “Ouape Zesocca madirra orrarrerani” nazapa manaco ouape occa Abi Deo memeuarri madirrariza ouacomeranitoui: “Narraripa occa madirra rraraui” onanitoui −nade Zeso.

Comaqquiri narrarideni Deocca dacorehema titinanomi-baqquimana nana. Madirra zoqquemanarrarideni naco Deocca dacorehema pouadeni titinauatonimana nana. Madirra zamacoma onini leprarrine rrazimanarrarideni naco Deocca dacorehema uapidenicca titinanomi-baqquimana nana. Madirra bodideniza Tocorime-Taminecca zozosse tabaqqui tocorime madizemanarrarideni naco bodidenicca zosse zosse titininebaqquimana narro, onarraro. Rrehe, tiadenizape manaconi rrirehe Deo pocca dacorehe tiadeniza inanarraro. Tiadeni naqui narrarideni tobiquemani-manazapa manaconitoui uati tiquenerrerarri, onarraro −nade Zeso.

Nema nezape ticappinemana terrerarri! onarraro. Ppiriripa arramani toquerrenaraha bazima Deo ecauabaqquirrari. Naraha tiadenizana denima uati uana tarrari. Tiadeni touacaua-baqquiuissa tauitoui, onarraro −nade Zeso.

—Tiadenipe tibodideniza: “Rrehe, Zesopa arrirraro namiza rronehe torrarizaniuarrine ccarronarrari” tiquenanitide. Neraha ouape madirra carronerara canauiuarrine occarrona-rrerani. Madirra cauadirere canauiuarrinera occarronarraro −nade Zeso.