Popular Bible Verses from Marcos 11

Share

Usa ꞌain cana mitsu cain, —asérabi ca Nucën Papa Diosan ꞌën cacëxun ꞌë ꞌaxunti ꞌicë —quixun sinania ca an mitsúnmi ñucácësabi oquin mitsu ꞌaxunti ꞌicën.

Asérabi cana mitsu cain, unían —sapi ca ꞌatima ꞌicë —quixun sinánquinma —asérabi ca Nucën Papa Diosan ꞌati ꞌicë —quixun sinánquin, ënë matá —ënuax ca parúmpapanu racati cuantan —quixun cacëx ca usai ꞌiti ꞌicën.

Unibë ꞌaisama ꞌaish Nucën Papa Dios naínu ꞌicë abë banaquin camina axa mimi ꞌuchacë uni cupiti sinánquinma a pain manuti ꞌain, usaribi oquian Nucën Papa Diosan min ꞌucha tërë́nquin manunun.

Cacëxun ca Jesusan cacëxa: —Ax cushiira ꞌixun ca Nucën Papa Diosan ax quicësabi oquin ꞌaia quixun sinani ca ami catamët.

Usaquin ꞌaquin ca unicama ꞌunánmiquin cacëxa: —Nucën Papa Diosan bana cuënëo ca quia: “Anuxun ꞌë rabiti xubu ax ca anuaxa camabi uni ꞌëbë banati xubu ꞌiti ꞌicën”. Usaía cuënëo bana quicë ꞌaínbi camina mitsun anuxun ñu maruquin uni paránquin mëcamati xubusa ꞌinun ënuxun ñu maruin.

Usobiani ca sharáquiani unicama cuancëxa. Raírinëxa rëcuë́nmainun ca raírinëxribi Jesús caxu cuani a rabi cuëëni quicancëxa: —Ënë unix ca upíira ꞌicën. Nucën ꞌIbu Diosan xucëx ca ënëx bërí aia. A ca camabi unin rabiti ꞌicën. Nun a rabinun ca ꞌacan.

Nucën rara Davitan rëbúnqui, ami sinania Nucën Papa Diosan ainan nu ꞌimiti, a ca ënëx ꞌicën. Nucën Papa Dios naínu ꞌicë, aribi cuëënquin rabinun ca ꞌacan.