Popular Bible Verses from Matthew 5

Share

Tä̱ħ'ä̱h, haeħ'gwah neħˑhuh' deħˑe'yäˑnoħ'dä̱ä̱h noˑgweh, na'yönˑdeˑgaħt ne yöntˑchĭs'doˑdah'gwaħ, neħ, kuh, neħˑhö'öˑsaˑyeˑyä̱ä̱h gaħˑnöh'gwaˑgö; neħ gwa, gä̱s, neħˑhuh' waħˑe'nyuˑdä̱ħ he'öˑweh ye'nyu'dahˑgwaħ; neħ, kuh, ne gaˑgwe'göh oħˑdya'goˑhat'heħˑdä̱ħ, ħe'niˑyö'gwehˑdaˑge öˑgyeh' yeˑyä̱hˑsä̱ħ. Neħ'huh, dih, nä̱ˑyuħ'dä̱ˑa̱k, dä̱ˑyuh'hatˑhe'aak ne deˑswah'hatˑhës'häħ, he'aˑdiˑgaħt nö'gweh; neħˑhuh' nön'daˑweehˑdʋk a'aˑdiˑgä̱ħ he'niˑwiˑyu ne swai'oħˑdʋs'häħˑshöħ'; neħ, kuh, neh dä̱'öˑwa̱'ä̱hˑsä̱'öˑnyööħ' ne Sheˑswaħ'nih, gä̱'öˑyaħˑgëh thä̱ħˑdyöħ.

Iis ne deˑyuh'hatˑhës'dahˑgöh he'yöˑä̱n'jaˑdeħ; Neħ noˑnön'daˑgä̱'yaat gaˑnön'daˑyä̱ħ deħˑa'öh a'waˑdah'sĭt.

Goˑdä̱'öh ne deħˑthaħ'gwĭsˑdä̱ħ deħˑao'weħ ne'waˑet'gä̱ħ gaˑwä̱n'nyahˑsaħ'gëh; neħ, sä̱ħ'ä̱h, nä̱ˑö'wa̱ˑgä̱ħ Na'wënˑni'yuħ.

Goˑdä̱'öh ne'neħ goˑdös'sweħˑda'nĭsˑthaħ, neħ, kuh, yeˑaħ'datˑhä̱s'thaħ na̱'yeˑi'waˑyeˑis he'niˑgai'wih'saħˑhöħ; neħ, sä̱ħ'ä̱h, nä̱ˑya'guhˑdaħt.

Neħ gwa', niiħ noħˑgwä̱'a̱s, Eħ'chiˑno'öhˑgwaak neh eħˑchiħ'niˑgö'ä̱sˑswa'ä̱s; neħ, kuh, neħˑchi'yaˑdö'eˑsyöh'gwaħˑse'aak na'yaˑgo'däħˑswi'yuˑaak, neh yönˑdö'eˑsyöh'gwaħ nae'saˑdäħ'swaˑet'gä̱ħt'; ä̱ˑshe'yaħˑda'geˑhaħ nöˑsʋs'swaˑä̱s; neħ, kuh, nä̱ˑshe'yaˑdä̱'na̱ˑyä̱'niˑak nö'saˑgä̱'ä̱ħˑsyöˑniih, kuh nöˑsa'nöhˑgöntˑhaħ.

Goˑdä̱'öh ne goˑda'deˑgä̱h he'waħˑo'dä̱sˑtheħt ne gutˑwaisˑhäħ, neħ, kuh, he'ehˑdaħ'gëh goˑda'döˑnih; neħ sä̱ħ'ä̱h goˑwä̱h ne gä̱'öˑyaħˑgëh oˑi'waħˑgëh ne dwä̱ˑnöh'döˑöħ'shäˑgwënˑni'yuħ.

Goˑdä̱'öh ne jeˑi'wʋsˑyöˑnih neh skä̱ä̱ˑnöħ taˑgai'wiˑyu'aak; neħ, sä̱ħˑä̱h, nä̱ˑye'yaˑsö'ök, Ha'wënˑni'yuħ hokˑsaħ'daħˑshöħ'.

Goˑdä̱'öh ne yönˑdä̱'na̱ħs'; neħ, sä̱ħ'ä̱h, naeh, neh dä̱ˑyön'dahˑni'göˑönˑdä̱ħ.

Goˑdä̱'öh nönˑdah'nöhˑgöntˑhaħ neħ tgai'öˑnih heˑgoˑi'waˑye'ĭsˑdöh heˑniˑgai'wih'saħˑhöħ; neħ, sä̱ħˑä̱h, goˑwä̱h ne gä̱'öˑyaħˑgëh oˑi'waħˑgëh ne dwä̱ˑnöh'döˑöħs'häˑgwënˑni'yuħ.

Goˑdä̱'öh ne goˑda'niˑdä̱ˑöh; neħ, sä̱ħˑä̱h, nä̱ˑye'gä̱ħ' nä̱'jönˑda'diˑdä̱ä̱h.

Swä̱nˑdä̱'öh nä̱ħ' iis noˑnä̱h' ä̱ˑyeħ'chiˑnöh'gönˑdä̱ħ nö'gweh; neħ', kuh, nä̱ˑyeħˑchiˑgä̱ä̱ħ'syöˑniħ; neħ', kuh, naaħ'deˑwaˑet'gä̱sˑhäˑge ä̱'yeħˑchi'waħˑĭs'thaak, ä̱ˑyeħ'chiˑyä̱'noˑwä̱h'daˑni'aak, neħ' ä̱nˑdyiu'iˑwaħ'gä̱ˑa̱k heh deˑsgwai'wa'gaˑneeħ. Jöħ'eˑshah, neħ, kuh, naaħ'deˑyuˑdoħk' jaˑdöh'ha̱ˑä̱h; oˑi'oˑwaˑnä̱h, sä̱ħˑä̱h, ä̱ˑdi'swatˑga'nyaħˑgä̱ħ ne gä̱'öˑyaħˑgëh; neħˑhuh', sä̱ħ'ä̱h, nĭtˑhö'wa̱nˑdi'nöhˑgöntˑhaħk noˑdi'doˑgä̱s'daˑnö'niˑak no'ä̱nˑdö'gwa heˑswaˑyaħ'daˑdeħ hoˑnön'döħˑöh.

Goˑdä̱'öh ne guħˑniˑgö'ä̱ˑniˑdä̱s; neħ, sä̱ħ'ä̱h, ä̱ˑya'goˑwä̱sˑtheħt he'yöˑä̱n'jaˑdeħ.

Iis neħ'huh noˑjĭk'heħˑdaħ he'yöˑä̱n'jaˑdeħ; neħ gwa', ne dyä̱'gwah ä̱ˑyut'gä̱hˑsö'ök noˑjĭk'heħˑdaħ, a'nä̱ntˑgaˑye'äħˑdak' nä̱ˑsga'jĭkˑheħ'daˑgäänt'? Neħ, waeh, neh deħˑtah'gwisˑdä̱ħ tö'saˑwaˑdĭs', neħ, shö, nas'deh hä̱ˑwa̱n'dyöˑök; neħ' kuh, dä̱ˑä̱'nä̱'ä̱sˑgä̱ħsˑyök' nö'gweh.

Neħ, dih, gai'öˑnih, Swai'waˑye'ĭsˑdöˑök' nä̱ħ' ĭis, ä̱ntˑchis'swaˑye'ä̱ˑa̱k he'nitˑhoˑi'waˑye'ĭsˑdöh ne Sheˑswaħ'nih ne gä̱ˑöˑyaħ thä̱ħˑdyöħ'.

Neħ gwa', heˑnä̱ˑyuħ'dä̱ˑa̱k ne dä̱ˑswat'hä̱ˑöˑnyök', neħˑhuh', neħ huh'; tä̱ħ'ä̱h, tä̱ħˑä̱h. Neħ, sä̱ħ'ä̱h, a'diħˑgwa'na̱ħˑot ä̱ˑga'at nä̱ˑgä̱, ne ho'gwa dwehˑdah'gwaħ haˑyaħ'daˑdeħ naaħ'niˑgö'et'gä̱ħ.

Swai'wa̱ˑöˑgä̱h, thä̱ˑnön'döˑök no'nä̱hˑjih, Neħ noˑga'aħ haħ'dä̱ä̱kˑneeħ' noˑga'aħ; neħ, kuh, noˑnoħ'jaħ haħ'dä̱ä̱kˑneeħ' noˑnoħ'jaħ. Neħ gwa', niiħ noħˑgwä̱'a̱s, Sä̱ˑnöh' niis neħ dä̱ˑjiˑswai'waħˑsäˑgwat ne'waˑetˑgä̱ħ; neħ gwa', ne sö'diħˑgwa'na̱ħˑot ä̱ˑä̱'nisˑoh'daˑgwä̱h'da'ä̱ħ ä̱ˑya'göˑek syä̱ˑneh'gö'gwa saˑda'hosˑgwaħ'gëh, ä̱ˑsat'ga''ä̱ˑguħ, neħ ne'waħ ne sgaˑgä'äˑdi'gwa ä̱ˑo'deħˑsä'yä̱sˑtheħs.

Neħ, kuh, ne dyä̱'gwah ne syä̱nˑneh'göh seˑga'at ä̱ˑsai'wa'neħˑaak'dä̱ħ, äntsˑdah'gwat; neħ, kuh, neh sih' hoħ'sa'dih'; neħ, sä̱ħˑä̱h, sas'hä̱ˑnöˑnyʋs'häħ niis, neh skat ön'deˑsa''däˑgwʋs' neh syaħˑdaħ'gëh, he'niˑyööh' sĭsˑda'nöh; naeh heˑniˑyuħ'dä̱ na'syaħˑda'gweˑgö'önˑdyĭëħ haˑnĭs'heˑo'na̱ħˑgëh ha'waħˑsä̱h'döˑök. Neħ, kuh, ne dyä̱'gwah ne syä̱nˑneh'göh sĭsˑoh'daħ ä̱ˑsai'wa'neħˑaak'dä̱ħ, iˑjaħk' ne'neħ; neħ, kuh, neh sih' hoħ'sa'dih'; neħ, sä̱ħ'ä̱h, sas'hä̱ˑnöˑnyʋs'häħ niis, neh skat ön'deˑsa'däˑgwʋs' neh syaħˑdaħ'gëh, he'niˑyööh' sĭsˑda'nöh; naeh heˑniˑyuħ'dä̱ na'syaħˑda'gweˑgö'önˑdyĭëħ haˑnĭs'heˑo'na̱ħˑgëh ha'waħˑsä̱h'döˑök.