Popular Bible Verses from Matie 5

Share

'Nɩ 'näpɛ wa kɛ 'yi döö‑ nä, waa' 'gbie ‑wʋ ‑takwë 'wlu, ‑mä zëkpë 'kʋ wa ŋʋɛ 'nɩ ɛ ŋänɩä gbëë' nyɩkpaa' 'fɩɩn 'kʋ. Nä, anyɩa' zëlüü, ɩ ŋänɩä 'sɔɔ nyɩkpa 'kʋ! Ɩmɩ 'mnö wa 'kä lä anyɩa' 'nägägbɩɩ 'yi 'nii ‑yä wa 'kä lä a 'Bä Laagɔ 'ŋnu fään.

Anyɩ‑ plöö‑ lä 'ylʋzɔɔ' zëlü. 'Duu lʋʋ wa 'slää‑ lä 'kükë 'wlu nä, ʋʋ' ‑lä 'kɔɔn 'kʋ zizio.

‑Wanö pleyii‑ ‑kplɔ lä wɩa nä, wa yä 'pʋ! Wa yi Laagɔ 'yi 'ni.

‑Lʋa 'yigëgbɩɩ' nʋtʋ bhlä lä nynä ‑gbugbe ‑yä 'mnätʋ 'sɔ nä, wa yä 'pʋ! Sä wa ylä lä nä, Laagɔ yiwa sɔɔ 'nyɛ.

‑Mä ‑amʋ kä n sonö'anyɩ lä nynä ‑mä, a wamä anyɩa' ‑zɔbhlɛgbänyʋä! ‑Wa ŋʋ'anyɩ lä 'kwlɩkabhɩää' nä, a 'pʋwa 'nyu ‑mä

‑Wa plöö‑ lä 'wugɔɔ 'mnö ŋäzönyʋä nä, wa yä 'pʋ! Laagɔɔ' 'Leyiduu ‑glö yɩ waa' lʋʋ.

‑Wa gbä lä 'nɩ 'kʋ wɔtɔlɩ kʋ lä nyɩkpa pää' nä, wa yä 'pʋ! Laagɔ yiwa ʋʋ' 'yuë laa.

‑Wa tu lä nä, wa yä 'pʋ! Laagɔ yiwa 'yii sɩɔ.

‑Lʋa wa klä lä nyenyisä 'yigëgbɩɩ' ‑za nä, wa yä 'pʋ! Laagɔɔ' 'Leyiduu plöö‑ yɩ waa' lʋʋ.

‑Wa ‑kä lä ŋäzöplɛ nä, wa yä 'pʋ! Laagɔ yiwa ŋäzö yibhë.

Anyɩ nä, nyɩkpa ka'anyɩ 'bhɩsɛ, 'nɩ wa ka'anyɩ 'sɩɩ nyenyisä klä, 'nɩ wa ka'anyɩ ‑kpläkplösä yëku 'mʋ sää 'naa 'ŋnöö ‑za nä, a yä 'pʋ! Nä, a nʋ ‑pʋpɛ ‑yä a kään ‑jäkä pleyii ‑mä, anyɩa' bɔɔpälɩ 'kädɩ ‑kʋ ‑mɔɔ Laagɔ yëku. 'Plɔfɛtɩnyʋa 'fɩɩn ‑wa ‑kʋ bhlä tɛɛ nä, sɔɔ ‑säkä ‑säkä wa ‑klʋwa lä nyenyisä.

‑Wa nää‑ lä plɛkʋ nä, wa yä 'pʋ! Laagɔɔ' ‑dʋdʋʋ ‑ʋ yi lä nä, Wamää‑ 'gʋʋ lä jaa 'kʋ lä lüü!

Anyɩ nä, anyɩ‑ plöö‑ lä ‑mää 'ylʋzɔɔ' glü. Glü kä nyɔnyɔɔ' ‑bhɩä nä, säsä wa yii bhä nʋ 'nɩ wa yii bhä bʋkʋ mɛnɔɔ' 'ŋʋʋ? Ɩɩ' yɩɔ lʋʋ 'kʋ ‑ŋwa nä, kwa jɛnɩ jlukʋ 'nɩ 'plöplönyʋä nämnönɩ 'kʋ.

Nä, 'Bäɔ ‑ɔ ‑kʋ lä ‑mɔɔ ‑laagɔɔ' nä, sɔ ‑kplɔɔ lä nä, anyɩ ‑mä 'sɩɩ a kplɔɔ 'sɔɔ!

A kä wälɩ nëë' ‑sä, 'nɩ a kä cii‑ nynä ‑ɛɛɛ! nä, anyɩa' ‑ɛɛɛ 'plö ‑ɛɛɛ. 'Ɩzä ka kä cii‑ nynä yio! nä, anyɩa' yio 'plö yio. A kɩ yɩ 'klë 'kʋ pään nä, ‑lɔɔ' 'klëa 'Dëvlo nëë' a bha ylä.

A nuu‑ 'sɩɩ nynä kɩ cio‑ nynä ‑mä, ‑n ‑lie kä‑ä 'yii ‑wlä nä, ‑n wlä 'sɩɩ ɔɔ' ‑lɛɛ! Ɔ kä‑ä gleeye nëë' ‑sä nä, ‑n ‑sɔɔ 'sɩɩ gleeye nëë'! ‑Mä ‑amʋ nä, kä mʋ'anyɩ yɩ soo ‑kää nynä nyɩkpɔ 'kanyɩ nyenyi ‑nʋ nä, a 'nä ‑sä ‑lä kpä. Nyɩkpɔ kä‑ä lüüklä‑nyukluu' 'kpeye paa‑ nä, ‑n tlɔɔ 'sɩɩ ‑mɔɔ' 'nyukluu ‑yä ɔ 'pʋʋ 'kpeye!

‑Naa lüüklä‑yie kä gbä 'nɩ ‑n gä nyenyii' bhlüü nä, ‑n ‑sɛɛ ‑mɔɔ! ‑N ‑sɛɛ ‑mɔɔ ‑yä ‑n 'pɛɛ 'klä fɛɛn! Sä ‑n 'gä 'bhë 'kʋ kʋ ‑yä ‑n 'gä ŋnäŋä ‑kosu ‑düdëa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑naa 'yɛkɛɛ, ɛmɛɛ‑ ‑lä ‑bha 'pɛlʋ 'kʋ ‑yä ʋ too, ɩyä ‑n 'gä ‑lɔɔ nëë' ‑bha. ‑Naa lüüklä ‑klɔgba kä gbä 'nɩ ‑n gä nyenyii' bhlüü nä, ‑n ‑döa 'kʋ ‑yä 'paa 'klä fɛɛn! Sä ‑n gä 'bhë 'kʋ kʋ ‑yä ‑n 'gä ŋnäŋä ‑kosuu' ‑düdëa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑naa 'yɛkɛɛ, ɛmɛɛ‑ ‑lä ‑bha 'pɛlʋ 'kʋ ‑yä ʋ too, ɩyä ‑n 'gä ‑lɔɔ nëë' ‑bha.