Popular Bible Verses from Lukö 6

Share

A 'nyɛmʋ a ‑liesɩ, ‑lɔɔ Laagɔ yi'anyɩ ‑kä 'sɩɩ 'nyɛ! Ʋ yi'anyɩ ‑jɛjɛsä 'nyɛ. Ʋ yi ‑jɛjɛsä 'plü, 'nɩ sʋ plüü‑ lä nä, ʋ yi sɔɔ koo, 'nɩ ʋ yi'anyɩ 'nyɛ ‑kaaa, 'nɩ sä ʋ nyɩ'anyɩ lä nä, ‑sɔɔ yi 'kʋ 'mɩä. ‑Lʋʋ a ‑kä 'nɩ a nyäka lä 'mʋ nä, ʋmʋ Laagɔ 'kä lä 'kʋ 'bhlü, ‑yä sä ʋ nyɩ'anyɩ lä nä, ʋ 'kä lä 'sɩɩ sɔɔ nyäka.

Nyɩkpa 'nänɔ nä, 'nää ‑a ‑kʋɔ lä pleyii nä, amä 'mnö ɔ sä 'nɩ ɔ nʋ lä 'nägägbɩ. 'Ɩzä nyɩkpa ‑nyonyo nä, nyenyii‑ ‑kʋɔ lä pleyii nä, ɩmɩ 'mnö ɔ sä 'nɩ ɔ nʋ lä gbenyenyi. ‑Ɔnö ‑za bhää? Nyɩkpɔ nä, wälɩ‑ ‑kʋɔ pleyii nä, ɩmɩɩ‑ ghlänöɔ nëë'.

‑Mä anyɩ nä, a wamä anyɩa' ‑zɔbhlɛgbänyʋä ‑yä a nʋwa 'nää! A kä nyɩkpɔ lʋʋ ‑gbla nä, a 'nä 'tɛnöɔ ‑lä dë nynä ‑mä, ɔ yi'anyɩmʋ 'ylɩbha! A kä sɔɔ nʋ nä, a yi bɔɔpälɩ 'kädɩ 'ni. Bʋkʋ 'nɩ, a yi 'Kʋzi Laagɔɔ' 'yuë 'plö. Laagɔ nä, kʋ ‑kä plɛkʋmɛnɔ. Laagɔ nä, kʋ nää‑ ‑abhlɛɛnyʋää' ‑za, 'nɩ ʋ nää‑ 'sɩɩ gbenyenyinyʋaa' ‑za.

Nä, anyɩ ‑mä 'sɩɩ, sä a 'Bä Laagɔ ‑kä lä kpänyɩ plɛkʋmɛnɔ nä, a kään 'sɩɩ sɔɔ plɛkʋmɛnɔ!

Aa' 'ŋʋ ‑lä a ‑liesɩ gbëgëdü yëku ‑lɔɔ Laagɔ nö'anyɩ 'tite 'ŋʋ! A 'nä klaa ‑lä a ‑liesɩ gbɩ, ‑lɔɔ Laagɔ nö'anyɩ ‑lä ‑kä gbʋ klaa! A cie a ‑liesɩ, ‑lɔɔ Laagɔ yi'anyɩ ‑kä cie!

Anyɩmɔɔ‑ ‑poo lä 'naa ciciwälɩɩ 'nyukwlii' nä, n sonö'anyɩ nynä a wamä anyɩa ‑zɔbhlɛgbänyʋä. Nyɩkpaa' ‑lʋa ‑wa ‑zɔɔ'anyɩ lä nä, a nʋwa 'nää! Nyɩkpaa' ‑lʋa ‑wa gbütü'anyɩ lä nä, a 'pʋwa 'nyu! Nyɩkpaa' ‑lʋa ‑wa kla'anyɩ lä nyenyisä nä, a bhibhie waa' 'wlu!

Sä a ‑waa lä nynä ‑mä nyɩkpa nʋ anyɩa ‑za nä, anyɩ ‑mä 'sɩɩ, a nʋ 'sɔɔ waa' ‑za!

Nyɩkpɔ kä‑ä 'nyuklu 'kpeye paa‑ nä, ‑n tlɔɔ 'sɩɩ ‑mɔɔ' 'nyukluu! Nyɩkpɔ kä ‑naa gbëbie‑lokwi yëku ‑sä nä, ‑n ‑tanöɔ 'yi ‑yä ɔ 'bhlü 'sɩɩ ‑naa 'kotuu 'kʋ! Nyɩkpɔ kä‑ä ‑zla nä, ‑n 'nyɩɔ! Nyɩkpɔ kä ‑naa kääkäälʋʋ ‑sä nä, ‑naa 'ylänöɔ 'nyʋ ‑läyɩɔ!

A ni su kä nää nä, ʋʋ' tlʋ ‑wʋ 'bhü nyënyü. 'Nɩ su kä 'sɩɩ ‑nyu nä, ʋʋ' tlʋ ‑wʋ 'bhü 'nänö.

Su nä, ʋʋ' 'bhüü' wa yibhënʋ. Waa' ‑läzä ‑tɩtɩɔ ‑gbukluye 'yii ‑sä, 'nɩ waa' ‑läzä 'sɩɩ ‑gälö nünë‑kpäkä 'yi ‑sä.