Popular Bible Verses from रोम 1

Share

म मसी का चोखा समचारऊँ कोनी सरमाऊँ क्युं क जखो बी बिस्वास करै बिकै छुटकारा ताँई ओ समचार पेली यहूदि मिनखा ताँई अर पाछै यूनानी मिनखा ताँई बी परमेसर की सक्‍ति ह।

क्युं क चोखो समचार परमेसर की धारमिक्‍तानै बतावै, आ धारमिक्‍ता सरूआतऊँ लेर आखीर ताँई बिस्वास प टिकरी ह जंय्यां क पबितर सास्तर म मंडर्यो ह, “धरमी मिनख बिस्वासऊँ जिसी।”

जद परमेसर इ सरस्टिनै रच्यो हो, जणाऊँई बिका नइ दिखबाळा गुण जखा बिकी जुग-जुग रेह्बाळी सक्‍ति अर ईस्बरीय सुभाव ह देख्यो गयो। परमेसर जोक्यु बी बणायो बिकै जरिए परमेसरनै साप-साप जाण्यो जावै ह, जिऊँ कोई कनै कोई भानो नइ होवै।

परमेसरनै जाणता बुजता बी बे बिको परमेसर की जंय्यां आदरमान कोनी कर्यो अर नइ बिनै धनेवाद दिओ। बाकी सोच बेकार होगी अर बाका बेबुदी मन अँधकारऊँ भरगा।

बे परमेसर का सचनै झूठ म बदल्या, अर जगतनै रचबाळा की झघा बिकी रचेड़ी चिजानै ध्यारीं अर बाकी सेवा करीं हीं, जगतनै रचबाळा की जे सदाई होवै। अंय्यांई होवै।

परमेसर की झाळ ईस्बर नगरीऊँ मिनखा का हरेक पाप अर बुराई क खिलाप परगट होवै ह, जखा बुराईऊँ सचनै दबावै ह।

इ बजेऊँ परमेसर बानै सरमनाक इंछ्या क बस म छोड दिओ। बाकी लूगाया बी आपका मोट्यार क सागै कुदरती भेवारनै छोडर अंय्यां-अंय्यां का भेवार राखबा लागगी जखा कुदरत क खिलाप ह। अर अंय्यांई मोट्यार लूगाया क सागै कुदरती भेवारनै छोडर मोट्यार, मोट्यार एक दुसरा क सागै काळो मुंडो करबा ताँई तड़फीं हीं। अंय्यां मोट्यार, मोट्यार क सागै काळो मुंडो कर बेसरमी भर्या कामा को फळ पार्या हीं जिका बे हकदार हीं। अर अठै ताँई बे परमेसरनै जाणबा को मोल कोनी जाण्या जणाई परमेसर बी बानै बाकी फालतु सोच प छोड दिओ, अर बे जखी नइ करनी चाए बे बाता करीं हीं।

बे बोलीं हीं क बे स्याणा हीं, पण बे तो मूरख हीं। अर बे नइ मिटबाळा परमेसर की मेमानै नास होबाळा मिनख, पंछ्या, जानबर अर पेटपल्याणा चालबाळा जिनावरा की मूरत्या म बदल दिआ।