Popular Bible Verses from Bo Bolɛ 39

Share

Anannganman nin Zozɛf be o nun, ɔ man ninnge ng'ɔ yo'n be yo kpa. Zozɛf trannin i min'n bɔbɔ i awlo lɔ.

Kpɛkuun bian'n yacili i ninnge mun kwlaa Zozɛf sa nun. I bɔbɔ ɔ'a kan-man like fi kun. I like b'ɔ yo i siɛn'n yɛlɛ i aliɛ dilɛ kunngba. Zozɛf nyinnin klanman, i nyrun waka'n ti klanman.

Kpɛkuun bisua su kpɛn sɔ'n fɛli i sieli bisuafuɛ'm be su nianfuɛ. Like kwlaa nga be ´yo'n, ɔ fin Zozɛf.

Nan ɔ'a tra Zozɛf ɔ'a wlɛ i bisua kan famiɛn'n i bisuafuɛ'm be o lɔ'n. Kɛ Zozɛf i bisua kɔlɛ'n yoli sa. Anannganman nin Zozɛf o nun. Ɔ yoli i kpa, ɔ man i wun yoli bisua su kpɛn'n i fɛ.

Be o lɛ kpɛkuun-ɔn, le kun Zozɛf i min'n i yi'n ɔ nian Zozɛf siin, kpɛkuun ɔ seli i kɛ: «A nin min `la.» Zozɛf ɔ'a kplin-man su. Ɔ seli bla'n kɛ: «Ɔ bɔbɔ a si kɛ like nga n yo i awlo'n nun'n, min min'n usa-man min nun. Ɔ fɛli i sa nun ninnge'n kwlaa wlali mín sa nun. Awlo'n nun wa'n, ɔ lɛ-man dunman tra-man min. Ɔ'a tannin-man min kɛ nán n kan like'n wie fi, san ɔ bɔ a ti i yi'n yɛ ɔ fata-man kɛ n kan wɔ-ɔ. Ɔ mɛn i ti, n yo sa tɛ dan nga-a ɔ yo-man ye. Sɛ n yo sɔ-ɔ, wuun Nyanmiɛn yɛ m'an wɔ i safle-ɔ.»

Le kun Zozɛf wluli sua lɔ kɛ ɔ ´ko di junman, kɛ ɔ ´yo sɔ'n, wuun awlo'n nun junman difuɛ'm be wie fi nun-man lɛ. Kpɛkuun bla'n ko sɔli i tralɛ'n ba, ɔ seli Zozɛf kɛ: «A nin min `la.» Zozɛf yacili tralɛ'n nun mɛnnin i nan ɔ'a wanndi ɔ'a bo nun gua su lɔ.