Popular Bible Verses from Mátyuu 5

Share

Onet o*fí* mú odamee otyuryíkáng o-yip dyicáng o-cít kámú*. Nké o-twôom m kámú ké kyikit ńkyí badatwôom otyuryíkáng, eringe nyí odatông nang yeě mú mu ké kyise kiinwángé. Ké dyizong-bukwóp ándyi, kiinwángé enen to kyi-man kyi-kûsan ké bushú ḿbú banet, eringe nyí mbé badari byěm ḿbyí byinong ḿbyí bamu ba-chi i, ne ba-kye Bonchí enen mú mu kyíbóng akpee.

Ben bamu wǎ kiinwángé ńkyí kyidasan kángkáng ejíí. Oshê mú ba/bi kámú ké kaku oo*nwa erôo*.

Bunyîn-dyityém mbu ne banet ḿbé atyém ebe nyi kpárádádát, ké ebóng, mbé ba/chi ba-ri Osówo.

Bunyîn-dyityém mbu ne banet ḿbé mbe ne kyijé chwóó ké byěm echi ḿbyí Osówo mu o-ryuu ng o/fu, banet bachi, ké ebóng, Osówo o/chi o-kye kámbé nang ebóng chwǒm ńkyí mbe ba-ryuu ng.

Nké me mu n-sét ng běn kántîk n/fu, kyú ne kyijé ne banet-bushwôn eyên, fé nshwam a-kye Osówo ké bubwô-banet ḿbé mbe ba-kyâ ǒ busông.

bunyîn-dyityém mbu ne banet ḿbé mbe ba-nyît ng ba/fu, mbé ba-chi i banet-kyikpu ké bushú-Osówo, ké ebóng, banjware ḿbé Butu ḿbú Osówo ba/já kámbé.

Bunyîn-dyityém mbu ne banet ḿbé mbe ba-chi i ba/fu, banet bakyú ké bunyîn-dyityém ne barî, ké ebóng, Osówo o/chi o-kó kámbé bwǎn emen.

Bunyîn-dyityém mbu ne banet ḿbé mbe ba-ta ng dyikán, ké ebóng, Osówo o/chi o-fé kámbé dyityém.

Bunyîn-dyityém mbu ne banet ḿbé mbe ba-kyâ kámbé busông, ké ebóng, mbé mbe ba-chi i ńkyí Osówo mu o-ryuu ng o/fu, banet bachi, ké ebóng, banjware ḿbé Butu ḿbú Osówo ba/já kámbé.

Bunyîn-dyityém mbu ne banet ḿbé mbe ba-ri ng barî-banet bafip, ké ebóng, Osówo o/chi o-ri kámbé to bafip.

Bunyîn-dyityém mbu ne ben ké nkéré banet ba-kú ba-kyâ běn edángé, ba-kyâ běn busông, ba-bât ng běn kángkáng azong-byibî-byěm nyí a*fí ké kafâ* ké ebóng, bamu ba-cen n ne me ké kyikû. Jêe n̂g, ké ebóng, Osówo oo/tî běn kiǐtí-eyáré kyíbóng. Éné to nké banet ba/kye bamkpábé ḿbé badasét byiraa-Osówo ḿbé kpákpá busông.

Bunyîn-dyityém mbu ne banet ḿbé mbe degere ké bushú ḿbú Osówo, ké ebóng, mbé ba/chi ba-koo ńkyí Osówo oo/ryí ocím.

Ben bamu wǎ bano ḿbé badanyîn kángkáng banet. Nké â bano ba*fí to ne bunyîn ké byiko* bukwóp bu*fí to ḿbú badachîchi kámbé ba-chîkpet enyîn*. Bano ámbe baa/bên, ba-bwa kâng ne mbé ba-pwó kú. Banet ba-kûcím kámbé ké byiká.

Ben ba-man ba-kyú banet ḿbé mbe kanong kerededet, wǎ eringe nyí Bonchí enen mú kyíbóng mu.

Kû n̂g ebángê, âa nkyi éné, aa kyi*fí éné* nké nke. Nang ebóng chwǒm kyikíri ńkyí adachîfu kyi/fím ne Otu-Byibî-Barím.

Ben baa/jwo ńkyí Músis o/mû o/tángê běn to o/fu, â onet o/chi ǒ kyibî, a-chi ǎ to. Nké me mu n-sét ng běn kántîk n/fu, *da n̂g echi ba-kûsó onet ewa mú o/chi běn kyibî*. Â onet o/díp ǒ dyikwâ ké dyínán ńdyí bubwô-etyebéng, bírî dyínán ńdyí bubwô-eku to a-chî ǎ etông o-díp.

Nké â dyichi eyên ńdyí bubwô-etyebéng nké ndyi dyi-chi i ǒ a-chi i kyibî, zú kándyí a-twóp kú. Nkyi kanong ne wo ńkyí adatánê kyipang-enyam-byiko eyên kyibónge, kyi-shwôm ńkyí badakúng kyirim-enyam-byiko eyên kyimúmú ba-twóp ké kyikit-busông eri. Nké â bubwô-etyebéng eyên nké mbu bu-chi i ǒ a-chi i kyibî, két kámbú a-twóp kú. Nkyi kanong ne wo ńkyí adatánê kyipang-enyam-byiko eyên kyibónge, kyi-shwôm ńkyí kyirim-enyam-byiko eyên kyimúmú kyidajé ké kyikit-busông eri.