Popular Bible Verses from Iasat 1

Share

Kake ing'amumu intae engolon, tenelotu Enkiyang'et Sinyati shumata intae, niaakuku intae lchakenini laainei tiatua Yerusalem, o tiatua Yudea pooki o Samaria, o metabaiki ineeiting'ie enkop.”

Nejoki Yesu ninche, “Ore rishat o nkatitin naa Papa lai ake openy oitore makewan, nemeishoro intae entayiolo enkata naaku.

Ore pee etumo ninche te nebo, neitanap Yesu ajoki, “Emipuo aaing'uaa Yerusalem, kake entaanyu enkishorunoto natejo Papa keishoru, anaa enatiaaka intae. Amu te nkare apa eibatisishe Yohana, kake ore too nkuti olong'i, keibatisae intae te Nkiyang'et Sinyati.”

Ore te rishata oo nkolong'i artam, etulusoyie keeya enye, neipang'aka ninche katitin kumok, too nkoitoi naaitadedeyie te ninche pee eoru ninche olng'ash nchere keishu; netoduaa ninche ninye, eirorie ninche eimaki mbaa e nkitoria e Nkai.

Ore pee eidip atejo neijia, eing'orita ninche, neilepieki aaya keper neitemoo enkatampoi arishie nkonyek enye.

Ore egira aaimariri shumata aaduaaya ninye eloito, ore nabo kata nemaniki ltung'ana aare ooishopito nkilani naaibor eitashe. Nejo, “Lo lewa le Galilaya, kainyoo pee intasheshe tene aaing'or shumata? Ore Yesu, ele oilepieki aaitung'uaa intae aaya keper keitu aikununye anaa ina nitoduaaitie elo keper.”