Popular Bible Verses from NEHEMIA 9

Share

Nanging paraleluur titiange raris sumbung tur bengkung, tur tempal ring titah-titah IRatune. Ipun nenten sairing ring titah IRatune tur ipun lali ring saluiring pakardin IRatune. Ipun lali ring praciri-praciri sane sampun adakang IRatu. Sajeroning kasombonganipune, ipun milih satunggaling pamimpin buat mimpin ipun mawali ka genahipune dados panjak ring Mesir. Nanging Palungguh IRatu maraga Widi sane ngampurayang, darma miwah asih sueca, tur nenten gelis duka. Agung pisan sih kawelas arsan Palungguh IRatune. Palungguh IRatu nenten nilarin ipun.

Sapangrarisipun, pasamuan Israele tumuli ngastawa sapuniki: “Oduh Ratu Sang Hyang Widi Wasa, wantah IRatu ngraga sane maraga Widi. Palungguh IRatu sane ngardi akasa miwah bintang-bintange ring langite. Palungguh IRatu ngardi pretiwi miwah segara rauhing sadagingipun. Palungguh IRatu mapaica urip ring saluiring sane murip. Wadua bala suargane pada sumungkem nyumbah IRatu.

Nanging Palungguh IRatu nenten ngutang ipun ring tanah melakange, duaning kawelas arsan Palungguh IRatune kalintang ageng. Palungguh IRatu nenten ngingsirang mega wiadin genine sane nyuluhin pamarginipune rahina miwah wengi. Malantaran kabecikan Palungguh IRatune, IRatu sampun ngandikain ipun indik sane patut laksanayang ipun. Palungguh IRatu mapaica manna makadados panganipune, tur mapaica toya pabuat kinumnyane. Sajeroning petang dasa taun ring tanah melakange, Palungguh IRatu nyediayang saluiring kabuatannyane. Panganggennyane nenten naenin uek, tur buntutnyane nenten kembung-kembung kasakitan.