Popular Bible Verses from Lucas 8

Share

’A mashita lä dodijidai jamö ai mobä bläläa lä culayono weinaja, ai bä ma cuinö tä a̦ ji̦liaö cuwä mö feduweje —a cuma—. Ö̦jö bä lä dodijaö wei bä lä cuinö, bä bufi bejedimolanö tä a̦ ji̦liaö cuaaöje. Tä a̦ fa ji̦liajenö, tä a̦ nofi jaducubou dodijioje. Bä bufi yanöcölanö tä a̦ juadiije ja, etä yai dodijidawä cublaliyo.

’Tä mösöcöböobä jamö mobä bläläa lä culaliyono weinaja, ai bä ma cuinö tä a̦ ji̦liaö cuwä mö feduweje —a cuma—. Tä a̦ ma ji̦liablaö wejei ma cui, täbä showadi lä yabäcäblou wei tä ja, bä yabäcäablalou majöblao dicoo. Madofi bä ca̦i tabou bufi doblaoje. Cama bä cuaaö bufi lä doblao wei tä ja, bä ca̦i yabäcäo. Ö̦jö däjä, Yai Bada nija bä bufi badadalou fa mlacunö, tä lä dodijidai etä mili wawäblou ma cule, etä liyäjäbloimi.

’Bei masi blaobä jamö mobä bläläa lä culaliyono weinaja, ai bä mö feduwänö tä a̦ ca̦i ji̦liaö cuaaöje —a cuma—. Tä a̦ ji̦liaöje däjä, bufi doblalanö tä a̦ däaöje. Ö̦jö ma cui, mobä nasöcö daloblou fa mlacunö, mosibä dedejebloimi. Ö̦jö mosibä lä culenaja bä lä cui, tä a̦ bejedi jaba ma bufilei wejei ma cui, bä yabäcamou däjä, bä waiquidou.

Cama ebä nija abinaja a cuma. —¿Wedi tä tabä wamale nofi li mölaboimi dicoo? —a cuma. Bä quilima. Bä bufi shädayaimou ja, bä wa̦liyoma. —¿Ei wedi bei a li dodijiwä? Wadoli a bada ma cui, mau u bada lä shäyäjou wei u ma cui, cama a wa̦nö täbä nofi mladou si ijejewä yai —bä cuma.

Bei yo jamö mobä bläläö lä cuaaö weinaja, ai bänö Yai Bada etä a̦ ji̦liaö cuaaöje. Tä a̦ ji̦liaöje ja, fecula bada a fa waloiquiyonö, bei bä bufi jamö tä a̦ lä didile etä a̦ doaö nocamou, tä a̦ bejedi bufii mlaobeje. Bä jucäamou mlaobä.

’Inaja showawä, jödödöwä tä nia bluca wawädowä cuo. Fei däjä ai tä a̦ ji̦limamou nofi mojodi ma cui, obi tä a̦ nia malä walalablou wei. Fei däjä ai tä a̦ ma jo̦yale ma cui, obi tä a̦ nia wawäblou malä nomöjöo wei.

Ö̦jö däjä, “Ya lä jubälöfe, tä jo̦yaami waiquiwä”, a suwä bufi fa cunö, a wawäblaliyoma. A quilili blösö blösömolanö a ajedequema. Jesús cotä jamö a möfe fa deialunö, bluca täbä mamo mötale däjä, a wa̦ nö wäquema. A jalobä a jubädaö bufi lä doblaono wei tä ma cui, a jaloa lä showadaaliyono wei tä ma cui, ö̦jö tä a̦fa bluca wäa showadaquema. Abinaja Jesús e cuma. —Ami. Camiyä wale nofi mölaboma yalo, wa jalolayou lä cufe. A bufi yanöcöwä ca̦i da co̦jamö —a cuma.

A jushulajenö abinaja a nowa tamaje. —¡Tä a̦ wäyäle! ¡Yamalecö da bayeliblalö! ¡Bämacö mishi duo a lä cube! Ö̦jö däjä, a fa jocädalunö, wadoli a wasöa showadalema, u ca̦i bada lä shäyäjono wei u ca̦i. Ö̦jö a wa̦nö wadoli a ca̦i mladou fa showadalonö, tä bluca ononodou showadalayoma.