Popular Bible Verses from Génesis 39

Share

Jeobaanö José a ca̦i fa cuonö, a bayeliblamou fe yadioma. A bayeliblamoma cudeenö, a dodijaö fe yadioma. José a lä tabono wei, Ejidoteli a lä cui e yano ja, a cuo cadidioma.

Inaja tä fa cuonö, jödödöwä täbä bluca lä tabono wei täbä nowamabä, José a lämabou showaoma. José a nofi mölabou dodijioma yalo, cama ebä nofi jalujubonomi. Ö̦jö täbä ja a yabäcou mlai, a nia lä iyano wei tä ja, a bufi shino cadidiablaloma. Bei. José a lä cui, a dodijidaoma. A liyäjäoma.

Ö̦jö däjä, bada anö José a nofi mölaboma yalo, a lämaquema. Ai bä fe lao mö lä feduono wei jamö, José a läo mö feduobä a tamaquema. Ö̦jamö tä bluca lä tamono wei, cama Josénö tä bluca tama.

José a juwäa fa showalänö, a shi wa̦limaquema. Bada a yai lä cuinö täbä fe lamabobä jamö, José a ca̦i fa didicönö, a fe laquema. Ö̦jamö a fe ma laqueno wei ma cui, Jeobaanö showadi José a ca̦i cuo showaoma. Showadi a nofimama yalo, a nofimaö showaoma. ¿Ö̦jö tawä? Täbä fe lä laono wei jamö a bada lä läono wei a lä cui, Jeobaanö a bufi tamalema, José a nofi ojodabobä.

Ya̦cumö, cama bada bei suwäbö e lä cui, José nija a bufi waiyoma. —Bei. Bäfäcö da yacao —a cuma. A cuma ma cui, a wa̦ juanomi. Cama bada bei suwäbö e nija, abinaja José a shino cuma. —Camiyä ya yai läo yalo, iba bada e yafi jamö, bluca täbä cua ma cule, täbä nofi jaluboimi. Camiyä wale nofi mölabou dodijio cudeenö, bluca bä lä tabole ya ebä nowamabä, wale lämabou lä cule. Ei yafi ja, camiyä ya wa̦ faö ja, cama a ma cui, a wa̦ läomi. Bluca bä lä tabole bä ma cui, camiyä nija bä noshi umaboimi. Cama wa e li yalo, wa noshi nia yai umabou. ¿Ö̦jö tawä? Wa lä cufe tä dodijidawämi waiquiwä. Yai Bada tä lä cui, ya tä nö ca̦i waiblabö mlai —José a cuma.

Ö̦jö ma cui, abinaja tä cublaliyoma. A ojodamobä, yafi jamö José a lucälayoma. Ai täbä wa̦lo cuo fa mlacunö, a yafi blocooma. Ö̦jö däjä, ö̦jö suwä a lä cuinö, José camishi ecö ja, i̦cali a juwäa showadalema. —Bäfäcö da yacao —a cuma. A ma cuno wei ma cui, José a jucäo ja, suwä anö cäcö lä juwäale cäcö fa dacöfälönö, sibo jamö lobe a docua showadalayofälöma.