Popular Bible Verses from Lukas 9

Share

Yesus bilang pa dorang samua, “Sapa yang mo iko pa Kita, dia tara bole iko dia pe mau. Tiap hari dia musti siap menderita sampe mati karna iko pa Kita, itu sama deng dia pikul dia pe salib untuk iko pa Kita.

Karna sapa yang hidup cuma untuk dia pe diri sandiri, dia itu akan mati tapisa deng Tuhan Allah slama-lamanya. Tapi orang yang tara iko dia pe mau sandiri karna dia iko pa Kita, dia itu akan dapa hidup deng Tuhan Allah slama-lamanya.

Yesus bilang pa dia, “Orang yang sementara bapacol tapi salalu balia ka balakang, dia pe karja jadi tara butul. Bagitu lagi deng orang yang mau jadi Tuhan Allah pe umat yang Dia Berkuasa sebagai Raja, orang itu so tara bole inga hal-hal laeng lagi.”

Tarada dia pe untung to, kalu satu orang dapa samua harta di dunia ini, tapi dia mati tapisa deng Tuhan Allah slama-lamanya.

Karna sapa yang malu mangaku dia iko pa Kita deng iko Kita pe ajaran, nanti waktu Kita Anak Manusia datang ulang, Kita me akan malu mangaku dia iko pa Kita. Waktu itu Kita datang deng Kita pe kuasa yang luar biasa deng Kita pe Bapa pe kuasa yang luar biasa deng malaekat-malaekat yang kudus.

Yesus bilang pa dia pake umpama bagini, “Anjing utang ada dia pe tampa batidor. Bagitu lagi deng burung, ada dia pe sarang. Tapi Anak Manusia yang dari sorga, tara ada tampa untuk baistrahat.”

Turus, Dia bilang pa dorang, “Sapa yang tarima pa orang biasa-biasa saja sama deng ana kacil ini karna orang itu percaya pa Kita, itu sama deng dia so tarima pa Kita. Deng sapa yang tarima pa Kita, dia me tarima pa Tuhan Allah yang utus pa Kita. Karna sapa yang anggap dia pe diri biasa-biasa saja dari antara ngoni, dia itu suda yang Tuhan Allah anggap paling hebat.”