Popular Bible Verses from लूका 3

Share

जाह़लू सारे लोकां दे बपतिस्मा लैणे ते बाद यीशु भी जाह़लू बपतिस्मा लेई करी प्रार्थना करणा लग्गा, तां अम्बर खुली गेआ। कने पवित्र आत्मा कबूतरे साइआं तिस पर आया, कने परमात्मे सुअर्गे ते ग्लाया, “तू मेरा प्यारा पुत्तर ऐ, जिस नैं मैं प्यार रखदा ऐ, मैं तिज्जो ते खुस ऐ।”

ताह़लू यूहन्ने तिन्हां सबना जो ग्लाया, मैं तां तुहां जो पांणिये ते बपतिस्मा दिंदा ऐ, अपर सैह़ ओणे आल़ा मसीह ऐ, जेह्ड़ा मिन्जो ते सामर्थी ऐ। मैं तां इस जोग्गा भी नीं कि तिसदे जूत्तेयां देयां तस्मेआं दी गठ्ठी भी खोली सकैं। सैह़ तां तुहां जो पवित्र आत्मा कने अग्गी ते बपतिस्मा दिंगा।

कने अपणे-अपणे मने जो पापां ते बदलणे दा खरे कम्म करी नैं सबूत देआ, कि सच्च बिच्च तुहां मन बदली लियो हन कने एह़ सोचणा छड्डी देआ, कि ‘अहां तां अब्राहमे दे वंशे दे हन, तां अहां बची जांगे।’ क्जोकि मैं तुहां नैं ग्लांदा ऐ, कि परमात्मा इन्हां पत्थरां ते भी अब्राहमे तांई औलाद पैदा करी सकदा ऐ।

हुण गल्ल इआं कि परमात्मा हर इक्की जो जेह्ड़ा मने जो नीं बदलणा चांह़दा, तिसियो सज़ा दैणे तांई बिलकुल त्यार ऐ। ठीक तिंआं ई जिंआं कि कुआड़ी रूखां दियां जड़ा पर रखियो ऐ, इसतांई जेह्ड़ा-जेह्ड़ा रूख खरा फल़ नीं दिंदा, सैह़ बड्डी करी अग्गी च फूकेया जांदा ऐ।”

जिंआं यशायाह भविष्यवक्ता दे ग्लायो वचनां दिया कताबा च लिख्या ऐ, कि “सुनसाण जगाह च इक्क हक्कां पाणे आल़े दी उआज़ सुम्मां दी कि, ‘प्रभु तांई लोकां देयां मनां जो त्यार करा, कने अपणे आप्पे जो सुधारा। हर इक्क खाई भरी दित्ती जांगी, कने सारे प्हाड़ कने टिले बराबर होई जांगे; कने जेह्ड़े टेड्डे कने उबड़ खाबड़ हन, सैह़ रस्ते बराबर कित्ते जाणे। कने हर इक्क माणु तिसदा दर्शन करगा, जेह्ड़ा परमात्मे दे पास्से ते छुटकारा दैणे तांई घल्लेया ऐ’।”