Popular Bible Verses from यूहन्ना 15

Share

मैं अंगूरा दी बेल ऐ, तुहां डाल़िआं हन। जेह्ड़ा मिन्जो सौगी जुड़ी रैंह्दा ऐ कने मैं तिस सौगी, सैह़ मते फल़ दिंदा ऐ, क्जोकि मिन्जो ते लग्ग होई नैं तुहां कुच्छ भी नीं करी सकदे।

तुहां मिन्जो सौगी जुड़ी रेह्आ, कने मैं तुहां सौगी। जिंआं डाल़ी जे अंगूरा दी बेली सौगी जुड़ी नीं रैंह्, तां अप्पु ते नीं फल़ी सकदी, तिंआं ई तुहां भी जे मिन्जो सौगी जुड़ी नीं रैह़न तां नीं फल़ी सकदे हन।

जे तुहां मिन्जो सौगी जुड़ी रैह़न, कने मेरे वचन तुहां च बणी रैह़न, जेह्ड़ा कुच्छ तुहां चांह़दे हन सैह़ मंगा कने सैह़ तुहां तांई होई जांगा।

तुहां मिन्जो नीं चुणेया अपर मैं तुहां जो चुणेया ऐ कने तुहां जो नियुक्त कित्या कि तुहां जाई नैं फल़ लेयोन कने तुहां दा फल़ बणी रैंह्, कि तुहां मेरे नांऐ ते जेह्ड़ा कुच्छ पिता ते मंगन, सैह़ तुहां जो दैं।

इसते बड्डा प्यार कुसी दा नीं, कि कोई अपणे साथियां तांई अपणे प्राण दैं।

जेह्ड़ी डाल़ी मिन्जो नैं जुड़ियो ऐ कने फल़दी नीं ऐ, तिसा जो सैह़ बड्डी दिंदा ऐ, कने जेह्ड़ी फल़दी ऐ तिसा जो छांगदा ऐ तांजे होर जादा फल़ें।

“मेरा हुक्म एह़ ऐ, कि जिंआं मैं तुहां नैं प्यार रखेया, तिंआं ई तुहां भी इक्की दूये नैं प्यार रखा।

मेरे पिता दी महिमा इसी ते हुंदी ऐ, कि तुहां मता सारा फल़ लेई करी ओन, ताह़लू तुहां मेरे चेले हुंगे।

यीशुयैं ग्लाया, “सच्ची अंगूरा दी बेल मैं ऐ, कने मेरा पिता किसान ऐ।

जे कोई मिन्जो सौगी जुड़ी नीं रैंह्, तां सैह़ डाल़िया साइआं सट्टी दित्ता जांदा, कने जाह़लू सैह़ सुकी जांदियां हन; तां लोक तिन्हां जो बटीणी नैं अग्गी च पाई दिंदे हन, कने सैह़ फकौई जांदियां हन।

मैं एह़ गल्लां तुहां नैं इसतांई ग्लाईयां हन, कि मेरी खुसी तुहां च बणी रैंह्, कने तुहां दी खुसी पूरी होई जां।

जे तुहां मेरे हुक्मां जो मनगे, तां मेरे प्यारे च बणी रैंह्गे; जिंआं कि मैं अपणे पिता दे हुक्मां जो मन्नेया ऐ, कने तिसदे प्यारे च बणी रैंह्दा ऐ।

इन्हां गल्लां दे हुक्म मैं तुहां जो इसतांई दित्ते कि तुहां इक्की दूये नैं प्यार रखन।

जे तुहां संसारे दे लोकां साइआं हुंदे, तां संसार अपणेयां लोकां नैं प्यार रखदा; अपर इसा बज़ाह ते कि तुहां संसारे दे नीं, मैं तुहां जो संसारे ते चुणी लेआ ऐ, इसतांई संसार दे लोक तुहां नैं बैर रखदा हन।