Popular Bible Verses from प्रेरित 5

Share

तैबै पतरस होर प्रेरितै ज़वाब धिना कि “मांहणु री हुक्म न ज़ादा ज़रूरी परमेश्वरै री हुक्म रा पूरा केरना सा।

होर हर रोज़ मन्दिरा न होर घौर-घौर ज़ाइआ प्रेरित खुशी रा समाद होर यीशु रै नाँ न उपदेश देणै न नी रूकै कि यीशु मसीह सा।

पर पतरसै बोलू, “हे हनन्याह! शैतानै तेरै मैना न ऐ गैल किबै पाई कि तू पवित्र आत्मा सैंघै झ़ूठ बोलला होर ज़मीनै री कीमती रै किछ़ ढैबुऐ आपु हागै रखला? ज़ैबै तैंईंयैं सौ ज़मीन तौ हागै ती कि तेरी नी ती ऑथि? होर ज़ैबै बिकी ता कि तेरै वशा न नी ती ऑथि? तैं ऐ गैल आपणै मना न किबै सोच़ी? तैं मांहणु सैंघै नी बल्कि परमेश्वरा सैंघै झ़ूठ बोलू।” इन्हां गैला शुणिआ हनन्याह मूँआ होर लोमा पौड़ू। ज़ेतरै बी लोकै ऐ गैला शुणी तिन्हां बै बड़ी डौर पौई।

ऐबै हांऊँ तुसाबै बोला सा कि इन्हां मांहणु न दूर रौहात् होर तिन्हां सैंघै किछ़ कोम मता रैखदै किबैकि अगर ऐ धर्म या कोम मांहणु री तरफा न सा ता ऐई मिटणा। पर अगर परमेश्वरै री तरफा न सा ता तुसै ऐईबै कैधी नी मिटाई सकदै। कोइँछ़ै ऐण्ढा नी लोड़ी हुआ कि तुसै परमेश्वरा सैंघै लड़नू आल़ै ठहरलै।”