Popular Bible Verses from Bahibulu 11

Share

Lino kusyoma nkutadonaika azintu nzyotulangila akusinizya kuti zintu nzyotutaboni nkozili ncobeni. Nkaambo kalusyomo oolu basikale bakamubotezya Leza.

Taakwe muntu uukonzya kubotezya Leza katakwe lusyomo. Nkaambo kufumbwa uuswena kuli Leza uleelede kuzumina kuti Leza mpali, alimwi akuti ulapa bulumbu kuli baabo bamuyandaula.

Alusyomo tulaziba kuti nyika yakalengwa amajwi aa Leza. Aboobo zintu eezi nzyotubona, zyakalengwa kuzintu nzyotutakonzyi kubona.

Alusyomo Abulahamu wakaswiilila ciindi Leza naakamwiita kuti aye kucisi cimbi eeco ncaakamusyomezya kuti uyoomupa. Wakasiya cisi cakwe katezi kuti uya kuli. Alusyomo wakaakukkala mucisi Leza ncaakamusyomezya mbuli mweenzu. Izaka a Jakobo bakatambula cisyomezyo ca Leza eeco, bakali kukkala mumatente mbuli Abulahamu.

Alusyomo Nowa wakaswiilila kucenjezya kwa Leza kwaamba zintu zyakacili kuyooza nzyaatakali kukonzya kubona. Wakayaka bbwato kuti walo amukwasyi wakwe bafutulwe. Mukucita boobo Nowa wakazula baansi alimwi wakatambula bululami Leza mbwapa baabo bamusyoma.

Alusyomo Enoki wakatolwa kujulu, taakafwa pe. Kwiina muntu wakamujana, nkaambo Leza wakamutola kujulu. Malembe atwaambila kuti Enoki katanatolwa kujulu, wakali kubotezya Leza.

Alusyomo Abela wakapa kuli Leza cipaizyo citambulika kwiinda ca Kaini. Abela wakazuminwa kuti mmululami nkaambo Leza mwini wakaba kamboni mukutambula zipo zyakwe. Akaambo kalusyomo lwakwe Abela ucaambaula asunu, nikuba kuti ulifwide.

Alusyomo awalo Sala wakakonzya kujana mwana kali mucembele kale. Wakasyoma Leza kuti uyoobamba cisyomezyo cakwe.

Nkaambo Abulahamu wakali kulangila munzi uumbi uulaantalisyo njumu, wakayeeyegwa akuyakwa a Leza.

Alusyomo Mozesi wakakaka kwiitwa kuti muzyukulu wa Falo. Wakayanda kupenzegwa antoomwe abantu ba Leza kubaazya kutangala akukkomana muzibi kwakaindi kasyoonto. Wakayeeya kuti kusampaulwa akaambo ka Munanike wa Leza nkubotu kwiinda buvubi bwa Ijipiti. Kayi wakali kulangila bulumbu bwakacili kuyooboola kumbele. Alusyomo Mozesi wakazwa mu Ijipiti, taakwe naakayoowa bukali bwamuleli wamumo pe. Taakapiluka nkaambo mbuli kuti wakabona yooyo uutaboneki.

Alusyomo Abulahamu wakatituule Izaka mbuli cipaizyo ciindi Leza naakamusunka. Nikuba kuti wakali yooyo Leza ngwaakapede cisyomezyo, pele wakalilibambilide kale kumutuuzya mbuli cipaizyo mwanaakwe alikke buyo.

Alusyomo Lahabu mwaamu taakajailwa aamwi abaabo batakaswiilila Leza, mukuti wakabatambula kabotu basikutwela.

Alusyomo Baisilayeli bakazubuka Lwizi Lusalala anyika njumu nta. Baijipiti nibakasoleka kuzubuka, maanzi akabavuppa baloba myoo!

Alusyomo bwaanda bwamunzi wa Jeliko bwakakolomokela ansi, nibakamana kubuzinguluka Baisilayeli kwamazuba aali ciloba.

Alusyomo wakabamba Pobwe lya Kwiindilila, alimwi wakalailila kuti bantu basansaile bulowa azicinda kuti mungelo uunyonyoona bana bataanzi atagumi bana ba Baisilayeli.

Alusyomo Josefa, naakali aafwiifwi kufwa, wakaamba kuti caakuba ciindi Baisilayeli bayoolonga mu Ijipiti. Wakabalailila mbobakeelede kuyoocita amafuwa aakwe.

Alusyomo Jakobo naakali aafwiifwi kufwa, wakaleleka bana boonse bobilo ba Josefa, mpawo wakasiminina amusako wakwe, walumba Leza.

Alusyomo Izaka wakaleleka Jakobo a Isau akubasyomezya kuti bayootambula zileleko zibotu kumbele.