Popular Bible Verses from Mark 2

Share

Ma Yisɔs ɔ təl ti-e, ɔ pa ro ŋaŋ, Ŋaŋ aŋa yi ayenki mədɛr aŋ yema hɛ ubolomba, kɛrɛ ante yeŋki mədɛr, ŋa yema ubolomba. I der hɛ tə kəmuti aŋlompi, kɛrɛ i der tə kəmuti aŋfəm aləs tə kəthupi.

Ma Yisɔsȧŋ ɔ nənk kȧlanɛ ka ŋaŋ-e, ɔ pa ka ɔwe ba mathanthaŋ, Wan, a po tera ɛhakɛ ɛ mu.

kɔ pa ro ŋaŋ, A bɛmpa aŋsabath ta wuni kəpet, pə yi hɛ wuni kəpet ta aŋsabath.

Maŋ te gbəli fat kɔ salata ȧruniya-e, aŋ səli ɔgbak wa ȧŋseth ro ɔ yi, ɔwa maŋ po buli ri-e, aŋ thora kafənt ro ɔwuni tu məthanthaŋ ɔ fənthȧ.

Kɛrɛ kȧmȧ nə tȧrȧ kəpa ɔWan ka wuni ɔ ba afɔsɔ ka ȧdȧru tə kətera wuni ɛhakɛ yɔŋ-e, ɔ pa ka ɔwe ba mathanthaŋ, I kanɛ mu, Yokanɛ, gbasi kafənt ka mu mə kɔ ro seth ka mu.

Areke tha yi atuy tȧy, tə kəpa ka ɔwe tu məthanthaŋ, A po tera mu ɛhakɛ ɛ mu-e, thalɔm tə kəpa, Yokanɛ, gbasi kafənt ka mu, mə kɔth-e?

Ka ɔlɛmp wati ɔ gbasi kafənt, ɔ wur, ɔ kɔth rodi ka ŋaŋ bɛ, haŋ ŋa bɛ aŋ kabanɛ, kaŋ yikis Kurɔŋ, aŋ pa, Sə la hɛ nənk tȧy təwunɔŋ.