Popular Bible Verses from John 14

Share

Asomdwee na medze gya hom; mara m’asomdwee na medze mema hom: nnyɛ dɛ mbrɛ wiadze ma, na mema hom. Mma hom akoma nntutu, eso mma ɔmmbɔ hu.

Jesus see no dɛ, Emi nye ɔkwan no, nokwar no, nye nkwa no; obi mmba Egya no hɔ, gyedɛ ɔnam mo do.

Mma hom akoma nntutu: hom ngye Nyankopɔn ndzi, hom ngye mo so ndzi.

Na Okyigyinafo no a ɔyɛ Sunsum Krɔnkrɔn no a Egya no bɔsoma no wɔ me dzin mu no, ɔno na ɔbɛkyerɛkyerɛ hom ndzɛmba nyina: ɔbɛkaa hom dza maka akyerɛ hom nyina.

Nyia ɔwɔ me mbransɛm na odzi do no, ɔno nye nyia ɔdɔ me, na nyia ɔdɔ me no, m’Egya bɔdɔ no, na mo so mobɔdɔ no, na mibeyi moho makyerɛ no.

Na mibebisa Egya no, na ɔama hom Okyigyinafo fofor, ma ɔnye hom aabɛtsena daa: nokwar Sunsum no a: ɔno na wiadze nntum nngye no; osiandɛ onnhu no, na eso onnyim no: na hom dze, hom nyim no; osiandɛ ɔtse hom nkyɛn, na ɔbɛtsena hom mu.

Na biribiara a hom bɛserɛ wɔ me dzin mu no, ɔno na mebɛyɛ, ama Egya no eenya enyimnyam wɔ Ba no mu. Sɛ hom serɛ biribi wɔ me dzin mu a, mebɛyɛ.

Sɛ hom dɔ me a, hom ndzi me mbransɛm do.

M’egya fie wɔ tsenabew pii; sɛ ɔnntse dɛm a, nkyɛ maka akyerɛ hom. Morokɔ ekesiesie beebi mama hom.

Na sɛ mokɔ, na mikesiesie beebi ma hom a, mebɛba bio mabɛfa hom akɔ mankasa me nkyɛn, na mbrɛ mowɔ no, hom so aaba hɔ.

Tomas see no dɛ, Ewuradze, yennyim mbrɛ erokɔ, na yɛbɛyɛ dɛn ehu kwan no?