Popular Bible Verses from Popera ga Rómawa yexmagüxü̃ ga yaxõgüxü̃tanüwa namuxü̃ ga Pauru 12

Share

Rü tama name i ñoma i naanecüã̱x i duü̃xü̃gücümagu pexĩ. Natürü name nixĩ i Tupanana pegü pexãgü nax nüma pexü̃ naxüchicüüxü̃ca̱x rü ngexwaca̱xü̃xü̃ i peãxẽ pexü̃́ ngẽxmaxü̃ca̱x. Rü ngẽmaãcü tá nüxü̃ pecua̱x i ta̱xacü nixĩ ya Tupana pexü̃́ naxwa̱xexü̃, rü ta̱xacü nixĩ i nape̱xewa mexü̃, rü ta̱xacü nixĩ i namaxã nataãẽxü̃ rü ta̱xacü nixĩ i aixcüma mexü̃.

Rü dücax, Pa Chauenexẽgüx, Tupanaarü ngechaü̃gagu pexü̃ chaca̱a̱xü̃ nax Tupanana pegü pexãgüxü̃ nax norü ãmare i maxü̃xü̃ rü üünexü̃ i namaxã nataãẽxü̃ pixĩgüxü̃ca̱x. Rü ngẽmaãcü nixĩ i nanaxwa̱xexü̃ ya Tupana nax nüxü̃ picua̱xüü̃güxü̃.

Rü name nixĩ i taãẽãcü ípenangu̱xẽxẽ ñu̱xmata penayaxu i ngẽma Cristu nüxü̃ unetaxü̃. Rü ngẽxguma ngúxü̃ pexca̱x ínguxgu, rü name nixĩ i yáxna namaxã pexĩnüe. Rü name nixĩ i guxü̃guma peyumüxẽgü.

¡Rü naxuãẽ nax tama chixexü̃gu cunguxü̃ca̱x! Natürü name nixĩ i mexü̃ i ĩnümaxã icuyanaxoxẽxẽ i ngẽma chixexü̃.

Rü name nixĩ i wüxichigü pegü pengechaü̃gü, ñoma pegüenexẽxü̃chixü̃ pengechaü̃xü̃rüxü̃. Rü name nixĩ i pegümaxã petaãẽxẽxẽ rü pegü perüngü̃xẽxẽ erü pegüenexẽ pixĩgü.

Rü name nixĩ i aixcüma meama pegü pengechaü̃gü i wüxichigü. ¡Rü nüxü̃ pexo i guxü̃ma i ta̱xacü i chixexü̃ ixĩxü̃! ¡Rü nagu pexĩ i ngẽma aixcüma mexü̃ ixĩxü̃!

¡Rü pegü peporaexẽxẽ nax guxü̃ma i duü̃xü̃güxü̃ pengechaxü̃güxü̃ rü ngẽmaãcü wüxigu namaxã petaãxẽgüxü̃ca̱x!

Pa Chauenexẽgü ya Pexü̃ Changechaü̃güxe, tama name i pegütama pexütanü ega texé ta̱xacürü chixexü̃ pexca̱x ínguxẽẽgu. Natürü name nixĩ i Tupaname̱xẽgu penaxǘ i ngẽma nax nüma napoxcuãxü̃ca̱x. Erü Tupanaarü ore i ümatüxü̃wa rü ñanagürü: “Cho̱xme̱xwa nangẽxma nax duü̃xü̃güxü̃ chapoxcuxü̃ i norü chixexü̃ca̱x. Rü choma tá nüxü̃́ chanaxütanü i ngẽma duü̃xü̃ i chixexü̃ üxü̃”, ñanagürü ya tórü Cori.

Rü tama name i pexo. Natürü name nixĩ i perü ngúchaü̃maxã penaxü i Cori ya Tupanaarü puracü.

Rü Tupana ya chomaxã mecümacü, rü choxü̃ namu nax pemaxã nüxü̃ chixuxü̃ca̱x i guxãma i pemax nax tama namexü̃ nax texé i petanüwa tügü írütaxü̃ rü tügügu tarüxĩnüxü̃ nax togüarü yexera tixĩxü̃. Natürü name nixĩ nax wüxichigü mea tügü ngugüarü maxü̃ã́xü̃ rü tügügu rüxĩnüxü̃ nax Tupana yixĩxü̃ i tüxna naxãxü̃ i tümaarü cua̱x wüxigu namaxã i tümaarü õ.

Rü ngẽxguma texé chixexü̃ pexca̱x ínguxẽẽgu, ¡rü taxṹ i chixexü̃maxã pexütanüxü̃! Natürü name nixĩ i pegü peporaexẽxẽ nax mexü̃ pexügüxü̃ca̱x nape̱xewa i guxü̃ma i duü̃xü̃gü.

¡Rü pegü pengechaxü̃gü i wüxichigü! Rü tama name i pegü picua̱xüü̃gü. ¡Rü namaxã pegü pewüxiguxẽxẽ i ngẽma tama nügü icua̱xüü̃güxü̃! ¡Rü tama pegügu perüxĩnüe nax nüxü̃ icua̱xüchigüxü̃ pixĩgüxü̃!

Rü ngẽxguma ta̱xacürü chixexü̃ cuxca̱x ínguxẽẽgu i togü, rü name nixĩ i nagu quixũ i Tupanaarü ore i ñaxü̃, “Ngẽxguma curü uanü taiya̱xgu, ¡rü nachibüxẽxẽ! Rü ngẽxguma yata̱xawagu, ¡rü naxaxexẽxẽ! Erü ngẽxguma ngẽmaãcü cunaxü̱xgu, rü tá cunaxãnexẽxẽ”, ñaxü̃.

Rü ngẽxguma chi texé chixexü̃ pexca̱x ínguxẽẽgu, rü name nixĩ i tümaca̱x peyumüxẽgü. Rü name nixĩ i Tupanana tümaca̱x peca nax tüxü̃ nangü̃xẽẽxü̃ca̱x rü tama tüxü̃ napoxcuxü̃ca̱x. ¡Rü wüxigu tümamaxã petaãxẽgü ya yíxema taãxẽgüxe! ¡Rü wüxigu tümamaxã pexauxe ya yíxema ngechaü̃güxe rü auxexe!

Rü name nixĩ i nüxü̃ perüngü̃xẽxẽ i ngẽma yaxõgüxü̃ i nüxü̃́ nataxuxü̃. ¡Rü mea penayaxu i ngẽma duü̃xü̃gü i pexü̃tagu naxĩanexü̃!

Rü dücax, rü taxü̃newa nangẽxma i taeru rü tachacüxügü, rü taparagü rü muxü̃ma i to i taxü̃nearü ngẽmaxü̃gü. Rü wüxichigü i ngẽma taxü̃nearü ngẽmaxü̃gü rü nüxü̃́ nangẽxma i noxrütama puracü. Rü ngẽxgumarüxü̃ ta i yixema nax yaxõgüxü̃, rü woo nax imuxü̃ natürü Cristugagu wüxitama i natücumü tixĩgü. Rü ngẽmaãcü wüxichigü i yixema rü yigümücügü tixĩgü, erü wüxitücumü tixĩgü.