Popular Bible Verses from Ore i mexü̃ ga Cuáü̃ ümatüxü̃ 15

Share

Choma nixĩ i úbane, rü pema i nachacüügü. Rü yíxema chowa yaxṹẽchaxe rü choma i tümawa, rü aixcüma tá namu i norü o. Natürü ngẽxguma tama chowa peyaxũ̱xgüechagu, rü taxucürüwama ta̱xacü pexüe.

Rü name nixĩ i guxü̃guma chowa peyaxũ̱xgü, ngẽma nax choma rü pewa chayaxṹxü̃rüxü̃. Erü wüxi i úbachacüxü rü tama nüxica naxo, ega tama nanewa yaxũxgux. Rü ngẽxgumarüxü̃ ta i pema rü taxuacüma ta̱xacü cha̱u̱xca̱x pexü, ega tama chowa peyaxũ̱xgüechagu.

Rü ngẽxguma chowa peyaxũ̱xgüechagu rü taguma nüxü̃ ipeyarüngümaegu i ngẽma ore i pexü̃ changúexẽẽxü̃, rü marü name i naxca̱x ípeca i ta̱xacü i penaxwa̱xexü̃, rü choma rü tá pexna chanaxã.

Pema rü tama pexíra cha̱u̱xca̱x pedaugü, natürü chaxíra nixĩ ga pexca̱x chadauxü̃ rü pexü̃ chamuxü̃ nax ngéma pexĩxü̃ca̱x rü nüxü̃ pixuxü̃ca̱x i chorü ore nax chauxü̃tawa penagagüxü̃ca̱x i muxü̃ma i duü̃xü̃gü, rü nümagü rü guxü̃guma choxü̃́ yaxõgüãxü̃ca̱x. Rü ñu̱xũchi Chaunatü ya Tupana tá pexna nanaxã i guxü̃ma i ta̱xacü i chauégagu nüxna naxca̱x pecaxü̃.

Rü ngẽxguma wüxíe aixcüma tümamücüxü̃ ngechaü̃gu, rü woo tümaarü maxü̃ tümamücüca̱x itaxã. Rü nataxuma i to i ngechaü̃ i ngẽmaarü yexera ixĩxü̃.

Rü ngẽma úbachacüxü i tama choxü̃́ oxü̃, rü norü yora rü nayadae. Natürü ngẽma nachacüxü i oxü̃, rü mea nanamexẽẽtanü nax yexeraãcü poraãcü naxoxü̃ca̱x.

Rü choma pexü̃ chamu nax pemücügüxü̃ pengechaü̃güxü̃ca̱x, ngẽma choma nax pexü̃ changechaü̃xü̃rüxü̃.

Rü ngẽxguma muxü̃ i duü̃xü̃gü cha̱u̱xca̱x pegagügu, rü ngẽmawa tá nango̱x i Chaunatüarü pora. Rü ngẽmaãcü i pema rü aixcüma chorü ngúexü̃gü tá pixĩgü.

Rü ñanagürü ga Ngechuchu: —Choma nixĩ i ngẽma úbane i aixcüma ixĩxü̃. Rü Chaunatü nixĩ ya nüxna daucü i ngẽma úba.

Rü texé ya tama chowa yaxṹẽchaxe rü tá ítata̱xüchi. Rü wüxi i úbachacüxü i daexü̃ rü ipaxü̃ rü üxüwa iguxü̃rüxü̃ tá tixĩ.

Choma rü pemaxã nüxü̃ chixu i ngẽma nax chauxrüxü̃ petaãẽgüxü̃ca̱x. Rü ngẽxguma i pema rü tá aixcüma petaãẽgü.

Choma rü naga chaxĩnü i Chaunatüarü mugü rü nüma rü guxü̃guma choxü̃ nangechaü̃. Rü ngẽxgumarüxü̃ ta ega naga pexĩnüegu i chorü mugü, rü guxü̃gutáma pexü̃ changechaü̃.

Rü ngẽma nixĩ i pexü̃ chamuxü̃ nax pemücügüxü̃ pengechaü̃güxü̃ca̱x.

Rü ngẽxguma chi ñoma i naanecüã̱x i duü̃xü̃gürüxü̃ pixĩgügu, rü ñoma i naanecüã̱x i duü̃xü̃gü rü chi pexü̃ nangechaü̃gü ngẽma natanüxü̃xü̃ nax nangechaü̃güxü̃rüxü̃. Natürü choma nixĩ ga pexca̱x chadauxü̃ natanüwa ga ñoma ga naanecüã̱x ga duü̃xü̃gü. Rü ngẽmaca̱x nixĩ i pexchi naxaiexü̃, erü marü tama naxrüxü̃ pixĩgü.