Popular Bible Verses from Nüxíraxü̃xü̃ ga popera ga Pedru ümatüxü̃ 1

Share

¡Rü ngĩxã nüxü̃ ticua̱xüxü̃gü ya Tupana ya tórü Cori ya Ngechuchu ya Cristu Nanatü! Yerü yexguma Ngechuchu ya Cristuxü̃ wena namaxẽẽgu, rü tüxna nanaxã ga maxü̃ ga yexwaca̱xüxü̃, yerü poraãcü nüxü̃́ tangechaü̃tümüü̃gü. Rü ngẽmaca̱x i ñu̱xma i yixema rü ta ítanangu̱xẽxẽ nax wena tá imaxẽxü̃. Rü pema rü wüxi i ngunexü̃gu tá penayauxgü i guxü̃ma i ngẽma mexü̃gü ya Tupana tá pexna ãxü̃ i ñu̱xma daxũguxü̃ i naanegu pexü̃́ namaxã nanguxü̃xü̃. Rü ngẽma mexü̃gü ya Tupana tá pexna ãxü̃ rü tagutáma nachixe, rü tagutáma naxãũãchi, rü tagutáma nangau.

Rü ngẽmaca̱x name nixĩ i poraãcü petaãẽgü, rü nüetama nixĩ i ngẽxguma ñu̱xma paxaxãchi muxü̃ma i guxchaxü̃gü pexca̱x ínguxgu. Rü ngẽma perü õ rü ñoma úirurüxü̃ nixĩ. Rü ngẽma úiru rü üxümaxã nüxü̃ taxü nax nüxü̃ icuáxü̃ca̱x rü aixcüma úiruxüchi yixĩxü̃. Rü ngẽxguma peyaxõgüamagu ega woo guxchaxü̃gü pexca̱x ínguxgu, rü ngẽma perü õ rü wüxi i úiruarü yexera nixĩ nax namexü̃. Rü ngẽma úiru rü woo namexẽchi natürü düxwa nangau. Natürü ngẽxguma peyaxõgüamagu ega guxchaxü̃gü pexca̱x ínguxgu rü tá Tupanape̱xewa pime rü tá pexü̃ nicua̱xüxü̃ rü tá pemaxã nataãxẽ rü mexü̃ i pechica tá pexna naxã i ngẽxguma wena núma naxũxgu ya Ngechuchu ya Cristu.

Natürü penaxwa̱xe i mea pemaxẽ nax Tupanape̱xewa naxüünexü̃ca̱x i perü maxü̃. Erü nüma ya Tupana ya pexü̃ decü, rü naxüüne. Rü norü ore i ümatüxü̃wa rü ñanagürü: “Chanaxwa̱xe i pixüüne, erü choma rü chaxüüne”, ñanagürü.

Rü ñu̱xma nax Tupanaxacügü pixĩgüxü̃, rü penaxwa̱xe nax naga pexĩnüexü̃. Rü tama name i nagu pexĩ ga yema perü ngúchaü̃ ga ü̃pa nagu pexĩxü̃ ga yexguma tauta Tupanaxü̃ pecua̱xgu.

Rü ñu̱xma nax Cristuarü duü̃xü̃gü pixĩgüxü̃, rü penaxwa̱xe nax pexuãẽgüxü̃ rü ípememarexü̃ nax penaxüxü̃ i norü ngúchaü̃. Rü name nixĩ i aixcüma ípenangu̱xẽxẽ i guxü̃ma i ngẽma mexü̃gü ya Tupana tá pexna ãxü̃ i ngẽxguma Ngechuchu ya Cristu núma ũxgu.

Erü Tupanaarü ore i ümatüxü̃wa rü ñanagürü: “Guxü̃ma i duü̃xü̃gü rü ñoma wüxi i natüanerüü̃mare nixĩ. Rü guxü̃ma i norü mexü̃, rü wüxi i nanetüchacurüü̃mare nixĩ. Rü ngẽma natüane rü nayu, rü nachacu rü narüngu. Rü ngẽxgumarüxü̃ ta tama natai i duü̃xü̃güarü maxü̃ i ñoma i naanewa. Natürü tórü Coriarü ore rü taguma inayarüxo”, ñanagürü i Tupanaarü orewa. Rü ngẽma Tupanaarü ore nixĩ ga pemaxã nüxü̃ yaxugüxü̃.