Popular Bible Verses from Roma 4

Share

Abraham etaiken Allah oba itithogon hakokthek motok dogolik, “Allah nen abok yoknikhikhe etnogo, ebeat asigin a? Dek asigin a,” iluk wene munini ebekhidek welageikhe. Itithogon etaiken Allah baga hakotdiluk welageikhe iti baga obatnetdisinem Allah hogorakhe lageikhe. Itithogon hogorakhe dogolik, “Allah yi meke ti meke hagasusak erlok anek etnogo nen abok yoknikhikhe iti, ebe asiginat o,” iluk wene munini 'bogokhogonat welageikhe.

Wene iti hasik Allah nen Abraham men yogokhikhe, “Yi akhuni ti akhuni inukuloak etaga doalegat inopase re, hat meldagagi o,” iluk yogokhikhemo holal waganogo 'bisukha. Itithogon yogokhikhemo at Abraham akla nen, “At Allah akhuni warek meke inilugurinakhik, nen, yi meke ti meke dek meke ane baga weregetdigik, hagakherek meke nen abok yoknekhe iti eberogonat yoknekhe o,” iluk etaiken oba hakotdisikhe iti.

At Allah nen, nit at ane thagalogo thogotdisalok weak hagakhe lago iti nen, Yesus ebe akhuni nen wasuagaluk usa'i ageikhemo ebe wakhukhama, yabokane, “Wene hit hinoba meke korogo wokhigi,” iluk, at ninom ninapuke hunogo 'binageiluk ilugutdisikhe iti.

At Abraham nen, “An nen itago meke itithogon hagatlasugun,” iluk akla apausak motok dekmaat nen, “Eberogonat hagatlasigin,” iluk etaiken Allah oba hakotdiluk motok hagakhe lageikhe iti baga, Allah nen, “Hat nen itago meke motok doalegat yigithogon asugun o,” iluk abok yogokhikhe tak-tagat, yi akhuni ti akhuni inukuloak etaga doalegat inopase Abraham at ageikhe iti.

Halok he, Allah obabut hano nen werlegat woknisekherek, iluk uagaluk nen, ninetaiken at oba hakotdisinem abok isikhe meke iti, woknisekherek iti. Nit at nen itago meke wene Allah nen ninasuk wakhikhe wene iti hologo mothogon hagakhe dogolik, ninetaiken Allah oba hakotdogorek meke anek woknisekherek 'buk. Abraham it aperek ninom tha'bokhogonat ninopasema re, it iti at Abraham etaiken Allah oba hakotdisikhe iti hak, inetaiken Allah oba hakotdegarek meke wogeisegaregat o.

“It akhuni inasuk warek dek korlo hagakharek meke, Allah nen thagalogo here'isigik, weak hagakharek meke, thebelogo here'isigik, hagakhe meke inakla arleken akhoak o. Nen, it akhuni aperek weak hagakharek meke hasik, ninopase Allah Etagapogot nen eken 'biluk inoba wene 'bigidek meke inakla arleken akhoak o,” iluk holal waganogo 'bisikhemo werek.

Allah ane holal waganogo 'bisukha iti baga nikithogon isukha nogo? Men isukha dek nogo? Abraham etaiken Allah oba hakotdisikhemo re, at Allah nen, “Hat hobabut mothogon hagakhe dogou hak, hetaiken noba hakotdegenma, wene hoba meke korogo wokhigirik, hapuke nipisak hunogo 'bagagi itiat o,” iluk isikhemo, holal waganogo 'bisukha.