Popular Bible Verses from YOHANES 15

Share

Iyya'na pong anggoro, na iko takké-takkéna. Tau iya tette'é masséddi sibawa Iyya, na Iyya sibawa aléna, mabbuwai matu maéga; saba' rékko dé' nasibawa Iyya, dé' agaga mullé pogau'.

Tette'no masséddi sibawa Iyya, na Iyya tette tokka matu masséddi sibawa iko. Iyaro takké dé' naulléi makkébuwa, sangadinna rékko tette'i ri ponna. Makkuwatoniro iko, iya bawang mulléi mabbuwa rékko tette'ko masséddi sibawa Iyya.

Rékko tette'ko masséddi sibawa Iyya enrengngé pappagguruwak-Ku monroi ri laleng atimmu, éllauni ri Ambo'é; agi-agi muwacinnai; iyaro paréllaummu ripaddupai matu.

Tenniya iko pilé-Ka. Iyya ritu piléko, sibawa suroko lao untu' mabbuwa maéga – buwa-buwa iya dé'é nawedding binasa. Nawérékko Ambo'é agi-agi muwéllau ri Aléna ri laleng asek-Ku.

Tau iya kaminang mamaséiyéngngi sellao-sellaona iyanaritu tau iya mabbéréyangngi atuwonna untu' mennang.

Tungke' takké-Ku iya dé'é nakkébuwa, narette'i, sibawa tungke' takké mabbuwaé, nakurangiwi daunna sibawa Napaccingiwi kuwammengngi nalebbi maégapasi buwana.

Iyanaé paréntaku: Amaséiwi séddié lao ri laingngé, pada-pada Iyya mamaséiko.

Rékko mabbuwako maéga, Ambo'-Ku ripakaraja; narimakkuwannanaro tonget-tongekko mancaji ana' guruk-Ku.

Makkedasi Yésus, “Iyya'na pong anggoro tongengngé, na Ambo'-Ku iyanaritu paddare'na.

Tau iya dé'é natette' masséddi sibawa Iyya, riyabbéyangngi matu pada-pada takké, namancaji marakko. Takké-takké iya pada-padaéro ripaddeppungengngi matu, nariyabbéyang ri apié, nainappa ritunu.

Iya manennaé Upaissengiko, kuwammengngi arennuk-Ku engkai ri laleng atimmu, sibawa mancaji sukku arennummu.

Rékko mupajoppai parénta-parénta-Ku, tette'ko matinulu ri pammasé-Ku, pada-pada Iyya tette matinulu ri pammaséna Ambo'é nasaba pajoppai parénta-parénta-Na.

Iyanaé parénta-Ku lao ri iko: Amaséiwi séddié lao ri laingngé.”

Akkalarapanna nappunnangiko linoé, namaséiko matu linoé selaku appunnangenna. Iyakiya purano Upilé polé ri linoéwé, jaji tenniyano appunnangenna linoé. Iyanaro saba'na nabenciko linoé.