Popular Bible Verses from IGENESIS 27

Share

Ngamana uThixo wakunika kuwo umbethe wezulu, Nakuko ukuchuma komhlaba, Nentabalala yengqolowa, newayini entsha; Izizwe mazikukhonze, Izizwe ziqubude kuwe. Yiba yinkosi kubazalwana bakho, Baqubude kuwe oonyana bakanyoko; Úqalekisiwe okuqalekisayo, Úsikelelwe okusikelelayo.

Wathi, Kungokuba igama lakhe kusithiwa nguYakobi• na, le nto andigweqe ezi zihlandlo zozibini? Wathabatha ubuzibulo bam; nanku ngoku, ethabathe nentsikelelo yam. Wathi, Akundibekelanga ntsikelelo na mna?

Waphendula uIsake uyise, wathi kuye, Yabona, ikhaya lakho liya kuba lee nokuchuma komhlaba, Lee nombethe wezulu ovela phezulu. Ùya kuphila ngekrele lakho, umkhonze umninawa wakho; Kuthi wakudlokova, Uyàphule idyokhwe yakhe, isuke entanyeni yakho.

Wathi uEsawu kuyise, Inye na le ntsikelelo unayo, bawo? Ndísikelele nam, bawo. Waliphakamisa uEsawu izwi lakhe, walila.