Popular Bible Verses from GENESI 27

Share

Ngavhe Mudzimu a tshi u wisela ṅwando u bvaho ṱaḓulu, a ita uri masimu au a vhibvele, wa kaṋa mavhele manzhi na nḓirivhe dza waini. Ngavhe tshakha dzi tshi u shumela, vhathu vha mashango vha u luvha. Ngavhe u tshi vhusa vhana vha khotsi au, vhana vha mme au vha u luvha. Vhane vha u teketela ngavhe vha tshi teketelwa, vhane vha u shudufhadza vha shudufhadzwa.”

Esau a ri, “A tshi pfi Jakopo ho ngo rinwa zwavhuḓi? Zwino lwo no vha lwa vhuvhili a tshi mphura: O thoma a nnzhiela vhukomana, zwino o nnzhiela mashudu!” Zwenezwo a vhudzisa a ri, “A vho ngo vhuya vha ntsiela maṅwe mashudu?”

Khotsi awe Isaka a mu fhindula a ri, “U ḓo dzula kule na lupfumo lwa ḽifhasi, kule na ṅwando u bvaho ṱaḓulu. U ḓo tshila nga pfumo, wa shumela murathu wau. Hone u ḓo ri u tshi mu vutshela, wa bvula dzhogo yawe mutsingani wau wa i laṱa kule.”

Esau a vhudza khotsi awe a ri, “Muṋe wanga, vha tou vha na mashudu mathihi fhedzi? Nṋe a vha ntshudufhadzi-vho?” Esau a lila a tou ṱavha mukosi.