Popular Bible Verses from EKISODA 15

Share

Muṋe washu a ri, “Arali na thetshelesa ipfi ḽa Nṋe Yahavee Mudzimu waṋu zwavhuḓi, na ita zwine nda vhona zwi zwone, na vhulunga ndaela dzanga na tevhedza pfanelo dzoṱhe dze nda vhea, a thi nga ni ḓiseli khombo dzi no nga dziḽa dze nda dzi ḓisela Vhaegipita, ngauri ndi Nṋe Yahavee ane nda ni fhodza.”

Muṋe washu ndi Ene nungo dzanga, ndi Ene luimbo lwanga, ndi Ene o ntshidzaho. Ndi Ene Mudzimu wanga, ndi a mu renda; ndi Mudzimu wa khotsi anga, ndi a mu hulisa.

“Muṋe washu, ndi nnyi ane a nga Iwe kha midzimu? Ndi nnyi a re na vhugala vhukhethwa unga Iwe? U ofhisa nga zwihulu zwine wa ita; vhukuma u ita zwimangadzo.

Vhathu vhe wa vha vhofholola wo vha endedza nga lufuno lwau lu sa shanduki; u ḓo vha isa shangoni ḽau ḽikhethwa nga maanḓa au.

Vha swika Mara, hone maḓi a henefho o vha a tshi kalakata lwe vha si kone u a nwa; ndi zwe fhethu afho ha pfi Mara (Makalakata). Vhathu vha gungulela Mushe vha ri, “Ri ḓo nwa mini?” Mushe a rabela Muṋe washu, Muṋe washu a mu sumbedza luṅwe lutanda. Mushe a dzhia ulwo lutanda a lu posa maḓini ayo, maḓi a vho ḓifha. Henefho ndi he Muṋe washu a vha ṋea milayo uri vha tshile vha tshi i tevhedza, henefho ndi hone he a vha linga.