Popular Bible Verses from MATTHEU 24

Share

Mme lerato la ba bangata le tla tapa ka baka la ngatafalo ya bokgopo. Empa ya tiisetsang ho fihlela qetellong, ke yena ya tla bolokeha.

Evangeli ena ya mmuso e tla bolelwa lefatsheng lohle, e tle e be bopaki ho ditjhaba tsohle; mme e tla ba hona bofelo bo hlahang.

Le tla utlwa dintwa le medumo ya dintwa; le mpe le bone hore le se ke la tshoha; tseo tsohle e ka kgona di etsahale, empa le moo ha e eso ho be bona bofelo.

Hobane setjhaba se seng se tla tsohela setjhaba se seng matla, mmuso o mong o lwantshe mmuso o mong; ditlala di tla ba teng, le mafu a akaretsang, le ditshisinyeho tsa lefatshe ka nqa tse ngata. Empa tseo tsohle e tla ba qalo feela ya tlokotsi.

Lehodimo le lefatshe di tla feta, empa dipolelo tsa ka di ke ke tsa feta.

Hobane ba bangata ba tla tla ka lebitso la ka, ba re: Ke nna Kreste. Mme ba tla thetsa ba bangata.

Mohlang oo, le tla neelwa ho tshwenngwa, le tla bolawa, mme le tla hlouwa ke ditjhaba tsohle ka baka la lebitso la ka. Ke moo ba bangata ba tla kgoptjwa, mme ba tla ekana, ba tla hloyana. Ho tla hlaha baporofeta ba bohata ba bangata, mme ba tla thetsa batho ba bangata.

Jesu a ba araba, a re: Iponeleng, le tle le se ke la thetswa ke motho.

Le lona, itokiseng ke hona; hobane Mora motho o tla tla ka nako eo le sa e hopolang.

Lebelang hle; hobane ha le tsebe nako eo Morena wa lona a tla tla ka yona.

Haele letsatsi leo le hora eo, ha ho ya tsebang; esita le mangeloi a lehodimo ha a tsebe, leha e le Mora; empa ho tseba Ntate a nnotshi.

Hobane ho tla hlaha bokreste ba bohata, le baporofeta ba bohata, mme ba tla etsa mehlolo e meholo le meeka e ka thetsang le bona bakgethwa, hola ke ntho e ka etswang.

Empa jwalokaha ho bile mehleng ya Nowe, le ho tleng ha Mora motho ho tla ba jwalo. Hobane jwaloka mehleng e bileng teng pele ho morwallo wa metsi, ha batho ba ne ba eja, ba enwa, ba nyala, ba nyadisa, ha ba ha fihla tsatsi leo Nowe a keneng arekeng ka lona; ha ba ka ba lemoha, ha ba ha fihla morwallo, mme ba nkwa bohle ke wona: ho tla ba jwalo le ho tleng ha Mora motho.