Galaadpi causajcunaca Jordán yacuta ch'imbanapimi, Efraín aillupura cajcuna miticushpa saquirishcacunata chapacurcacuna. Chai saquirishcapuramanta maijan shamushpa yacuta ch'imbachun saquihuaichij nijpica: “¿Efrainpaj aillupurachu cangui?” nishpami tapurcacuna. “Mana chaipurachu cani” nijpica: “Shinashpaca Shibolet ni” nircacuna. Chai shimita mana rimai tucushpa “Sibolet” nijpica, japishcahuan chai yacu c'uchullapitajmi cungata p'itishpa huañuchircacuna. Chai punllaca Efraín aillupura cajcunataca, 42.000 runacunatami huañuchircacuna.