Popular Bible Verses from Atɔ Lɛsunahɛ 8

Share

Brɛá Okufabi amʋ lɛmaɩn atɔ sienɔsɩá bɔpʋtan ɔwʋlʋ amʋ ɔnɔ a, ɔsʋsʋ lɔlʋa fɛ dɔnhwɩrɩ-fʋn.

Bulu-ɔbɔpʋ gyankpapʋ lɔfʋlɩ mʋ ɔkpɛ. Mʋʋ botsu atsufolibi mʋ́a ogya ánɩ́ obugya lɛfra mʋ́, tswɩ mʋ́ wʋlɩ ɔsʋlʋsʋ. Nɩ beye ɔsʋlʋtɔ asa a, mʋ́tɔ iku-kʋlɛ mʋ́a mʋ́sʋ nyi pʋ́ mʋ́sʋ ɩfa fɛ́ɛ́ lɔhɔ plɩplɩplɩplɩ.

Nɛkɩ a, oyitsu ɔkʋ defuli, odesu kʋklʋkʋʋ ɔbɛɛ, “Aha ánɩ́ bétsia ɔsʋlʋ anfɩsʋ asa Bulu-abɔpʋ asa atrahɛ amʋ bɔ́fʋlɩ amʋ́ nkpɛ bʋgyɔwɩ tsenyɔ-tsesa!”

Bulu-ɔbɔpʋ nyɔsɩ lɔfʋlɩ mʋ ɔkpɛ. Ɩnʋ bɔtswɩ tɔkʋ fɛ ɩbʋ kpɔnkpɔntɩá ɩdɛhɔ wa ɔpʋtɔ, ɔpʋtɔye asatɔ ɩkʋlɛ lɛdamli obugya.

Ɩnʋ Bulu-ɔbɔpʋ sasɩ lɔfʋlɩ mʋ ɔkpɛ. Ɔtsrakpabi kpɔnkpɔɔnkpɔntɩ kʋá ɩdɛ ogya tsii fɛ obia lɛkpa tsu ɔsʋsʋ bɛda ntsu tsʋnhɛá ɩbʋ ɔyɩtɔ fɛ́ɛ́tɔ ye asatɔ iku-kʋlɛsʋ. Ɔtsrakpabi amʋ ɩda gyi “Ɔkɩta.” Ɩnʋ ntsu tsʋnhɛ amʋtɔye asatɔ iku-kʋlɛ lɔwa ɔkɩta dʋn ɔkpɩn. Mʋ́ ɔkɩta sʋ aha tsɔtsɔɔtsɔá bonu mʋ́ bowu.

Ɔbɔpʋ nasɩ lɔfʋlɩ mʋ klɛ. Ɩlɔwɔ owi mʋ́a ɔtsra pʋ́ ntsrakpabitɔye asatɔ iku-kʋlɛ. Mʋ́ fɛ́ɛ́ lodun. Ɩnɩ sʋ ɔyɩkɛhɛ mʋ́a owi tahɛtɔye asatɔ iku-kʋlɛ ɛ loklun.