Popular Bible Verses from ILUKU 14

Share

“Anụ wo mẹ! Ọng myị́ ọng ọlẹ kọ warị wẹ ẹga nyam, kọ ri ká ọháha ọlẹ kọ la ẹ-ẹga nya adamwụ lee ịnamwụ lee ahụ nyamwụ lee anyị nyamwụ lee anyịnamwụ alẹng bala anyang, dọmwụ tụ ọhịhị nya ịlọmwụ ọwa ayịdang, á chụ hi gụ ọháha ọlẹ ká ọngọọwa la ẹ-ẹga nyam am ayịdang ka aalẹ, ọngọọwa á chịla kọ ka ri ọngọjụgbẹyị nyam kpong-kpong kaka.

Ọng myị́ ọng ọlẹ kọ juwa ka hu agurube nya akama ọyẹyẹ tam nyamwụ chụ e-egbeju, ka juwa bam jẹ ka aalẹ, ọngọọwa á chịla kọ ka ri ọngọjụgbẹyị nyam kpong-kpong ka, ịnyịnyị.

Chajị ọng myị́ ọng ọlẹ kọ kpa ịlọmwụ ka uhye aalẹ, ị ka kpa ọngọọwa weji. Ma, ọng myị́ ọng ọlẹ kọ tị kpa ịlọmwụ keji aalẹ, ị ka kpa ọngọọwa ka uhye ịnyịnyị.”

Chajị nya ọọwa lẹ, ọng myị́ ọng ọlẹ kọ ka byẹjẹ ka tụụbwọ hi ang myị́ ang nya ịlọmwụ wuu deeji chajị nyam ka aalẹ, ọ́ ka jẹ́-ẹ ri ọngọjụgbẹyị nyam myị́ kaka.”

Anụ me irya nya ẹla ọlẹ wẹẹ. Oowo lẹpwụ nyanụ a tị́ juwa kọ ri kọ juwa tịtọ nyọka nwụ́ ube-oluhye kọ ka hụhụ, kụ okpoko nyamwụ achụ wuu, jẹ́ yẹkẹẹ, okpoko ọọwa nyị ka nwa ọwa lẹ, ene kọ ka dọmwụ nya ube ọọwa ọnwụnwụ ka? Ó-ri ịnyị kaka lẹ aalẹ, ụka kọ dọmwụ nya ube ọọwa omeme, kọ tị jwọọ nwụ́ chị eju myị́ kaka lẹ, angịnyị wuu a ka juwa kpa ọnụ họọ chajị nya ọọwa lẹlẹ. Ị ka juwa kpọọ họ yẹkẹẹ, ‘Wuu! Ala ịtụka dọmwụ họ́ọ lụmẹ. Ọ dọmwụ nya ube lẹ, ọ jwọọ nwụ́ myị́ chị eju wẹ wẹẹ?’ ”

Ọkọkọ nya ọọwa lẹ, ụka ká ka họ ang oriri wụrụ angịnyị ẹpwa lẹ aalẹ, angịlẹ kị ri ikpehika bala alikiri bala ikuku bala alidu anyị kem, a ka wụrụ ẹpwa ọọwa lẹlẹ. Aalẹ, ahị ọwawa ọtụka-ọtụka ka juwa hang ụka ọọwa lẹ. Chajị angịwẹ ayịdang á ka ye ịngịngịhyẹ họ hang kwiwa myị́ odehe ọlẹ kpong-kpong ka. Ọọwa lẹ, Ohe Oluhye a ka nwụng uri nya ụkụrwọ ọọwa lụka ọlẹ ká alabwẹla ịnyịịla ka wuleji bwula igu lẹlẹ.”

IJisọsị myịmyị byaa yẹkẹẹ, “Ịnọ, ịma ri ang ọlịpyọ! Ma, ọ́ tị ri ká ịma á gba ịpyọ ọlala nyamwụ daarụ hi ịlọmwụ lẹ, ale, ịma ọọwa a tị́ ka jẹ́-ẹ ye ịpyọ ọlala nyamwụ bwu myịmyị wẹẹ? Ụma nya ịma ọlịnyị, á ju apyobwuna ha ịpyị ọ-kpa họ ang lee o-ju apyobwuna nyọka hwọọ jula ọtẹwụụ ọ-kpa họ ang kaka. Kẹnẹ-kẹnẹ, ọ-tụ ụbwọ hi ịma ọlịnyị daarụ pyịyọọ mẹ ịnyị!” IJisọsị kpa ẹla ọlẹ tụ ẹla ọọwa ku yẹkẹẹ, “Ọng myị́ ọng ọlẹ kọ ju ụrụ ọ-kpa wo ẹla lẹ aalẹ, ọ wo etu nya ẹla ọlẹ mẹ!”