Popular Bible Verses from ỊJỌN 15

Share

“Am kpakpakpa a ri ịnịna nya okoji hanụ lẹ. Anụ a tị ri abwọ nyam lẹlẹ. Ọng myị́ ọng ọlẹ kọ myị bwu hụrụm, kaam ayịdang á juwa hịhị ẹ-ẹpwụ nyamwụ lẹ aalẹ, ọngọ ọlịnyị a ka nwụ́ egbe nya abwẹla ọnyịịla ju iru lẹlẹ. Chajị, anụ ayịdang á ka jụ ịngịngịhyẹ ọnyịịla họ myị́ kpong-kpong kaka. Kẹnẹ-kẹnẹ, ó ri kọ bwula ọngịrị nyam ene lẹ, mẹ ịnyị.

Lẹ, anụ myị ká ọhịhị nyanụ a bwu hụrụm pyịyọọ mẹ. Aalẹ, am ayịdang juwa ka juwa hịhị ẹ-ẹpwụ nyanụ pyịyọọ ịnyịnyị lẹ. Jaabwọ ká ụbwọ nya okoji á ka jẹ́-ẹ nwụ́ ugbe la ịlọmwụ myị́ kaka, kẹnẹ-kẹnẹ, ó ri kọ bwu hụrụ ugbile nya okoji ịnamwụ lẹ mẹ ịnyị wẹẹ, ịnyịnyị-ịnyịnyị, anụ ka jẹ́-ẹ nwụ́ ugbe nya ọhịhị ọnyịịla myị́ kaka lẹlẹ. Kẹnẹ-kẹnẹ, ó ri ká ọhịhị nyanụ ọọwa á bwu hụrụm ene lẹ mẹ ịnyị!”

Ó ri kaanụ abwọ nyam á juwa gbile enyi nya ọhịhị nyanụ bwu ẹpwụ nyam pyịyọọ, ká ẹla nyam á juwa hịhị ẹ-ẹpwụ nyanụ ịnyịnyị lẹ aalẹ, ang myị́ ang ọlẹ kọ baanụ, kanụ bịlẹm lẹ aalẹ, ang ọọwa ka juwa hanụ pyii lẹ.

Anụ wo mẹ! Aanụ a ri angị chụm chụ ka! Ma, am ayịdang a chụnụ chụ ha ịlọm lẹ. M ya ọngịrị nyam hanụ chajị kanụ ka kele ka odehe kaka nwụ́ egbe nya abwẹla ọnyịịla nya Ohe Oluhye lẹ! Chajị ká egbe nya abwẹla ọnyịịla nyanụ ịịwa ka juwa pyịyọọ. Chajị ká ang myị́ ang ọlẹ kanụ ka bịlẹ Ohe Oluhye Adịda la ẹnyị nyam lẹ, ká Ohe Oluhye ka hu ang ọọwa hanụ pyii ịnyịlẹhị.

Ọháha ọlala ọkịla ọhẹ-lọhẹ, á ji kọ ka gụ ụma nya ọháha ọlẹ ká ọngịnyị ehe jẹ́ byẹjẹ hu ọhịhị nyamwụ ga ha igu chajị nya aligu nyamwụ kaka.

Abwọ nya okoji ọọwa ịlẹ kị be hụrụm wuu lẹ, ọnyị myị ọnyị kọ myị nwụ́ ugbe lẹpwụ nyaa ka, Ohe Oluhye kaa hụla ụbwọ ọlịnyị daarụ him. Ma, ụbwọ nyam ọnyị myị ọnyị ọlẹ kọ tị juwa nwụ́ ugbe lẹ aalẹ, ụbwọ ọlịnyị, Ohe Oluhye a kaa hya abwọ ichiche nyamwụ hụrụ, chajị kọ ka jẹ́-ẹ nwụ́ egbe ọgwọgụ gụ olene lẹlẹ.

Ehile ọlẹ kam lẹẹ ya danụ eji a lẹẹ lẹ: Anụ la ọháha nya ịlẹhị-ịlẹhị ẹ-ẹga nya awụlẹ, jaabwọ kaam ayịdang wẹẹ la ọháha ọlịnyị ẹ-ẹga nyanụ mẹ.

Ang ọlẹ kọ ka kpa ogbo ogwogwo warị wẹ Ohe Oluhye Adịda, a ri egbe nya abwẹla ọnyịịla ọ-ka nwụ́nwụ lụmẹ nyanụ lẹlẹ. Chajị, ọọwa a ka jẹ́-ẹ mẹjẹ yẹkẹẹ, anụ ri angịjụgbẹyị nyam ịnyịlẹhị lẹlẹ.

IJisọsị byi angịjụgbẹyị nyamwụ yẹkẹẹ, “Am kpakpakpa a ri ịnịna nya okoji ọlẹ kị wụrụ ‘ịvayịn’ ha angịnyị ehe ẹ-ẹpwụ nya ẹla nya Ohe Oluhye lẹlẹ. Ohe Oluhye Adam a tị ri ayịdọlẹrụ Ọngọ la ọmwụ nya okoji ọọwa lẹ.

Ọng myị́ ọng ọlẹ kọ myị nwụ́ ọhịhị nyamwụ ọwa hụrụm ka aalẹ, ị ka hụla ọngọ ọlịnyị daarụ lala ụbwọ nya okoji ọlẹ kị hụla hi ịnamwụ kọ kaa nwọnwụ. Ọọwa lẹ, ị kaa go ụma nya abwọ ịnwọnwụ ịlịnyị ju ka ẹpwụ nya ila wurum lẹ, ị kaa rụ ila hụrụ lẹlẹ.

“M jam ya ala ịlẹ wuu jenu lẹẹlẹẹ, chajị ká ọkẹkẹnị ọchịchị ọtụka nyam ka jẹ́-ẹ hi juwa ẹ-ẹpwụ nyanụ pyịyọọ, chajị ká ọkẹkẹnị ọlẹpwụ nyanụ ka jẹ́-ẹ myịnụ pwẹẹpwẹẹ.

Ó ri kanụ juwa kpa ehile nyam wuu họ ụkụrwọ yẹẹyẹẹ lẹ aalẹ, anụ ka juwa ẹ-ẹpwụ nya ọháha nyam ọọwa pyịyọọ, jaabwọ kaam ayịdang lẹẹ kpa ehile nya Ohe Oluhye Adam wuu họ ụkụrwọ yẹẹyẹẹ, du kam godayị lẹẹ ẹ-ẹpwụ nya ọháha ọlala nyamwụ pyịyọọ ịnyịnyị lẹlẹ.”

Ang ọlẹ kam lẹẹ danụ ehile nyamwụ ri yẹkẹẹ, anụ la ọháha nya ịlẹhị-ịlẹhị ẹ-ẹga nya awụlẹ mẹ.”

Ó ri kaanụ ayịdang á ri ịnya odehe ọlẹ lụbwọ-lẹta lẹ, ịnọ, anụ ka há alodehe ịlẹ kị jẹ́ Ohe Oluhye kpong kpong kaka lẹ! Ma, chajị nyọlẹ kanụ ri ịnya odehe ọlẹ ka, kam chụnụ chụ wẹ, gbanụ kpehe bwu ẹpwụ nya odehe ọlẹ ha ịlọm, ịnyị a du kanụ wẹẹ wụ alodehe onyobyi ọlẹ ẹjẹ ịnyị lẹ.