Popular Bible Verses from ỌMWỤ ỌDADA 39

Share

Ụka ọọwa, Amkpaa juwa ta iJosẹfụ ẹ-ẹpwụ nya ang myị ang nyamwụ wuu ọ-ọpyị nya Ijipiti. Ịnyị, iJosẹfụ a hụwa ẹ-ẹpwa nya ịPọtịfa ayịbamwụ ọọwa lẹlẹ.

Ụka ká ịPọtịfa yẹ ịnyị lẹ, ọ tụụbwọ hi ang myị ang nyamwụ wuu ju iJosẹfụ ụ-ụbwọ lẹlẹ. Ụka ọọwa, ịPọtịfa ayịdang á kaa họ ịngịngịhyẹ ẹ-ẹpwa nyamwụ dala ọ-kụ chekeee hu ang ri kaka, chajị iJosẹfụ ụbwọọmwụ a kaa họ ang myị ang nyamwụ wuu họọ lẹlẹ. Ụka ọọwa, iJosẹfụ ayịdang ri okolobya ọlẹ kọ há ụhị nwurwo-nwurwo lụmẹ.

Ọọwa lẹ, olegbeju ọgbahị nya ube nya agba ọọwa a hu iJosẹfụ olegbeju nya alagba ịkịla wuu lẹlẹ. Ọọwa lẹ, ọ tụụbwọ hi ụkụrwọ myị ụkụrwọ olube nya agba ọọwa wuu ju iJosẹfụ ụ-ụbwọ lẹlẹ.

Ọọwa, ịPọtịfa a wu iJosẹfụ kpa kele kaka ju agba ụ-ụwa u-ube nya agba ọlẹ kị nwụ ha angịlẹ wuu kị da ẹla nya iFero Adịrahụ lẹlẹ. IJosẹfụ hụ u-ube nya agba ọọwa lụka ọtata. Amkpaa juwa ta iJosẹfụ ẹ-ẹpwụ nya ube nya agba ọọwa ịnyịnyị. Ohe Oluhye chị ọháha ọnahị nyamwụ ọlẹ kọ kaa gbu enyi ka ehe, ẹ-ẹga nya iJosẹfụ. Ọ họ ká olegbeju ọgbahị nya ube nya agba ọlụwa la ọháha ọtụka-ọtụka ẹ-ẹga nya iJosẹfụ ịnyịnyị.

Ụka kọ nụwa ịnyịnyịịnyị lẹ, iJosẹfụ a ju ahụ nya ayịbamwụ ẹ-ẹhị lụmẹ-lụmẹ gbee lẹ, ọ byoo yẹkẹẹ, “IJosẹfụ, kẹwẹ kahị bánọ lawụlẹ chẹẹ mẹ!” IJosẹfụ pwa byoo yẹkẹẹ, “Eheehe, yẹ wẹẹ, ayịbam ọrụng tụụbwọ hi ang myị ang ọlẹpwa nyamwụ wuu jum ụ-ụbwọ. Ọ gu ahị gboo hi ang myị ang nyamwụ wuu ham. Ayịbang kọ ri ayịdẹpwa riri lẹ, ọ yam kpẹhị rịrị ang wuu ẹ-ẹpwa nyamwụ. Ahụ ká ri ahụ nyamwụ ụbwọng kẹnẹ-kẹnẹ à hi kam kpẹhị rịrị kaka lẹlẹ. Ee lẹ, anyị, m̄ tị́ ka jẹ-ẹ họ ang onyobyi ọlịịwẹ kpụ m̄ ka họ pyị Ohe Oluhye ịnyị mẹ? Ịgọgọ ẹnẹnẹhẹ.”

Ịnyị, ẹnụtụrụ ọhẹ lẹ, iJosẹfụ a juwa u-ube nya ayịbamwụ ụbwọọmwụ-ụbwọọmwụ juwa họ ụkụrwọ, ụka ọlẹ ká ọnchẹ ọkịla ọhẹ-lọhẹ á ji ọnaabwọ kaka lẹlẹ. Ọọwa, ọnyang ọwẹ a ba iJosẹfụ kele ka ẹga ọlẹ kọ juwa họ ụkụrwọ lẹ, ọ yụbwọ dụrụ iJosẹfụ a-awụrụ ọtụka oluhye nyamwụ kịrẹkpẹ lẹ, ọ byoo yẹkẹẹ, “IJosẹfụ, chuchuu nọ tam chẹẹ mẹ.” Ụka ká iJosẹfụ pwa, ká ọnyang ọwẹ á myị kaka gbee lẹ, iJosẹfụ a pwọ awụrụ nyamwụ ọọwa jwoo ụ-ụbwọ lẹ, iJosẹfụ a rụnyẹ rụ kpehe hi ube ọọwa lẹlẹ.