Popular Bible Verses from UMÁTIYU 5

Share

Ɛ́ɛ́ nēé gē lɛ ɔlá kwu agege klla kwú ɔ̄ ú tayínū ɛháajɛ ɔgālā ŋ́, amáŋ é gē je ɔ́ ce ɛyí ɔdā ō lɛ agege ce ɔ́, kóō fíyáajɛ lɛ ācɛ dóódu nēe bá ipú inu ā. Ɔwɛ ékpó ɔ́ɔmā, aá cēyītīkwū kú ɔlá kú aá kóō fíyáajɛ iyɔ̄bū ācɛ, cɛ́ɛ́ kéē má úklɔ́ olɔhi kú aá, kéē cɛ̄tra Ádā aá, nōo yɔ̄ ɔkpáncō ā.

Aá lɛbɛ̄ɛba ɔlá ofíyajɛ kú odúúdú ɛcɛ á. Ɔlɛ́ nēé gwo ce ɛyí ɛfu í gáā tayínū glá ŋ́.

Ákú aá nɛ̄ ɔtū kú aá le yá ékpó klla le péee ō gbā Ɔwɔicō ā lɔhi nɛ̄hi, ohígbū ka aá géē bá ɛga nɛ̄ Ɔwɔicō yɔ̄ ā í má ɔ̄.

Ákú aá lɔhi nɛ̄hi, aá nēe ɔdā nōo kwu aá ɔtū fíyɛ́ dúú ā wɛ ka ɔdā nɛ̄ Ɔwɔicō tíne ā kóō le yá ā. Ɔwɔicō géē je ɔdā nɛ̄ aá dɔɔ̄kā ā lɛ aá.

Amáŋ n da aá ka, aá yíhɔtū tū aólɛlā kú aá, ká aá klla gbɔ̄ɔkɔ ohígbū ācɛ nēe ī yá aá ōwē ā.

Ó kahíníī, “Ákú aá nēe jé ká aá cɛgbá Ɔwɔicō ā lɔhi nɛ̄hi, ohígbū ka Ɔwɔicō mīyɛ aá wā ajɔ̄ɔ̄cɛ́ kú nū ɛɛ́!

Ákú aá nēe wɛ ācɛ o yɛ́ɛ́bɔ́ ɔtāhɛ̄ ācɛ ā lɔhi nɛ̄hi, ohígbū ka Ɔwɔicō géē hī aá ka ayí nū.

Ákú aá nēe bá ī yá ɔtūnōbí abālɔbányā ā lɔhi nɛ̄hi, Ɔwɔicō géē tū aá ɔtūlé.

Ákú aá nēé yá ōwē icíci ohígbū ɔdā olɔhi nɛ̄ aá yá āa lɔhi nɛ̄hi, ajɔ̄ɔ̄cɛ́ kú ɔkpáncō wɛ ákú aá.

Ákú aá nēe gē ményinyi ācɛ ā lɔhi nɛ̄hi, ohígbū ka Ɔwɔicō géē ményinyi aá.

Ákú aá nēé gē cá aá ɛcá, klla gē yá aá ōwē, klla gē kā ɛdɔ ɛ̄kɛ̄mgbɛ̄ obɔ̄bí dóódu ce aá ohígbū um ā lɔhi nɛ̄hi. Aá gwéeyē, ká ɔtū kóō kē he aá, ohígbū ka ulé kú aá nwuné ɔkpáncō. Aá kē jé ka ɛ́gɛ́nyā nēé kē yá ācomɛ́ɛbɛ nēe gbɔbū lɛ aá ā ōwē icíci dúú á.”

Ákú aá nēé lɔtūce ɔfú kú abɔ̄yī aá ŋ́ mā ā lɔhi nɛ̄hi, ohígbū ka Ɔwɔicō géē kpó odúúdú aɔ́dā olɔhi nōó cokónu kú nū ā lɛ aá.

Aá lɛbɛ̄ɛba ɔmā kú ɛcɛ á, amáŋ ɔ́dāŋ ka ɔmā í lɔnyɛ gɛ ŋ́, ɔdí nēé géē le tū ɔ̄ kóō klla lɔnyɛ āa? Ó tīile dúúmā glá gɛ ŋ́, ohígbū ɔ́ɔmā, é gē je ɔ́ pīya bónū, cɛ́ɛ́ ācɛ kē ī yɛ ɛyí nū.

Aá kóō yá ucē kpaakpa dúúdú ɛ́gɛ́nɛ̄ Ádā aá, nōo yɔ̄ ɔkpáncō ā gē yá ucē kpaakpa dúúdú ā.”

Aá kóō yá ka, ‘Īī’ kú aá kóō wɛ ‘Īī’ ɔkwɛ̄yi. Ká ‘Ehée’ kú aá kóō kē wɛ ‘Ehée’ ɔkwɛ̄yi. Ɔdā dúúmā nōo le fíyɛ́ ɛ̄nyā wɛ ɔdōōbɔ̄bí.

Aá le pó keé ka, ‘Eyī éyi kóō kwɛ̄yí eyī éyi. Ayīnu éyi kóō kwɛ̄yí ayīnu éyi.’ Amáŋ n da aá ka, ā híīī gwō ɔ̄cɛ obɔ̄bí dúúmā ɔ́ci ŋ́. Amáŋ ɔ́dāŋ ka ɔ̄cɛ lɛ abɔ̄ fíyɛ́ uwɔ ábáa abɔ̄lɔ́ná, lɛ ɔhá pīya tá lɛ ɔ́ dúú.

Ɔ́dāŋ́ ka eyī kú abɔ̄lɔ́ná kú uwɔ yá ká ā yá ɔdōōbɔ̄bí, lɛ ɔ́ wú, ká ā kwú ɔ̄ ú tónū ŋmá ɛgiyí uwɔ. Ohígbū koó géē lɔhi gā uwɔ fíyɛ́ ká āyā éyi kú iyē kú uwɔ kóō le bīya, ikɔkɔ nɛ̄ odúúdú iyē kú uwɔ géē ga ipú ɔlá kú ɔlíkɔtɔ. Ɔ́dāŋ́ ka abɔ̄lɔ́ná kú uwɔ yá ká ā yá ɔdōōbɔ̄bí á nɛ, lɛ ɔ́ hɛ́ ká ā kwú ɔ̄ ú tónū ŋmá ɛgiyí uwɔ. Ohígbū ka ó géē lɔhi gā uwɔ fíyɛ́ ká āyā éyi kú iyē kú uwɔ kóō le bīya, ikɔkɔ nɛ̄ odúúdú iyē kú uwɔ géē ga ipú ɔlá kú ɔlíkɔtɔ.