Popular Bible Verses from MARK 13

Share

U lilkom kulħadd isir jobgħodkom minħabba f’ismi. Imma min jibqa’ jżomm sħiħ sal-aħħar, dan isalva.

“Kunu għajnejkom miftuħa, ishru, għax ma tafux meta se jasal il-waqt.

“U meta jeħdukom biex jitilqukom f’idejhom, tinkwetawx ruħkom xi tkunu se tgħidu, iżda tkellmu kif tkunu mnebbħin dak il-ħin stess; għax mhux intom tkunu li titkellmu, imma l-Ispirtu s-Santu.

Is-sema u l-art jgħaddu, imma kliemi ma jgħaddix.

“Dwar dak il-jum u s-siegħa ħadd ma jaf meta se jaslu, anqas l-anġli fis-sema, u anqas l-Iben; ħadd ħlief il-Missier.

Meta tisimgħu min jitkellem fuq gwerer u xnigħat ta’ gwerer, xejn titħawdu. Dan jeħtieġ li jiġri, imma jkun għadu mhuwiex it-tmiem.

Mela ishru, għax ma tafux meta jiġi Sid id-dar, jekk hux filgħaxija, jew f’nofs il-lejl, jew xħin jidden is-serduk, jew inkella mas-sebħ, li ma jmurx jiġi għal għarrieda u jsibkom reqdin. U dak li qiegħed ngħid lilkom, qiegħed ngħidu għal kulħadd: ishru!”

Għax għad iqumu ġens kontra ġens u saltna kontra saltna, l-art titheżżeż f’ħafna bnadi, u jkun hawn ġuħ kbir. Dan ikun il-bidu tat-tbatijiet tal-ħlas.

Għax l-ewwel jeħtieġ li l-Evanġelju jkun imxandar lill-ġnus kollha.

Għad jiġu ħafna f’ismi u jgħidu, ‘Jien hu’, u jqarrqu b’ħafna nies.

Oqogħdu attenti! Għad jagħtukom f’idejn il-qrati, isawtukom fis-sinagogi, u titilgħu quddiem gvernaturi u slaten minħabba fija, biex tagħtu xhieda quddiemhom.

Għax għad jitfaċċaw ħafna messijiet foloz u profeti foloz, u jibdew jagħmlu sinjali, u għeġubijiet biex iqarrqu, jekk jista’ jkun, mqar bil-maħturin.

“Imma f’dawk il-jiem, wara dawk id-dwejjaq, ix-xemx tiddallam, il-qamar jitlef id-dija tiegħu, il-kwiekeb jibdew jaqgħu mis-sema, u l-qawwiet tas-smewwiet jitqallbu.