Popular Bible Verses from John 17

Share

A̱kaisopoa̱tsistotoosaawa ka̱a̱hksopokitapi̱i̱matahsaawa. Noohkohta̱nisttotsita mooka̱moʼtaʼpii. A̱mohka nitani̱ssi moka̱moʼtaʼpii nanista̱pawaanii kitsi̱poahsiistsi. Kitsi̱ʼpoahsiistsi, a̱nnihkaoʼka moka̱moʼtaʼpii.

Omi̱i̱ksi niita̱ʼpssksinookiksi, a̱nniksaoʼki a̱kaissksipaitapiiyaawa. Omi̱i̱ksi ki̱niitaʼpsskinookiiksi kiisto̱ahkaoʼka niʼtsita̱piiwahka nita̱ʼpanistapssiwahka A̱ʼpistotooki, omi̱i̱ksi ni̱niitapsskinookiksi niisto̱ahkaoʼk annaahk Jesus Christ, annaahka kitoʼtsskoaawahka, a̱nniksaoʼki a̱kaisskipaitapiiyaawa.

Ma̱tsiʼtsitapiiwa amo̱ksi nita̱waatsi̱moihkaahtamoaiksi. Nino̱o̱hkattohkanawaatsi̱moihkaahtamoayi omi̱i̱ksi ota̱koinaiʼtakia̱ttsaawaawaiksi, anni̱i̱ksi ota̱koohtookoaawaiksi. Nita̱kohtsitomaiʼtookiaawa. A̱yo ni̱nna. Ni̱tohkanawaatsi̱moihkaahtamoayaawa ma̱a̱hkohkanawanistapssaawa a̱nni niʼtsita̱piiyi, niʼto̱i nani̱stohpipaitapiiyihpi kiisto̱wa, kani̱stohpipaitapiiyihpi niisto̱wa ma̱a̱hkoohkattohpipaitapiiʼssaawa kiisto̱nnooni. Ki a̱nnihkayii ka̱taʼyaomaiʼtakiiksi a̱kohtsitomaiʼtsimiaawa kiisto a̱nnayii kito̱ʼtsskookssi.

A̱nnohka kima̱tawaanistohpa ka̱a̱hkohtsistapoʼtoahsaawa anno̱o ksa̱a̱hkomm. Nika̱kawaanii ka̱a̱hkitotoitsikatahsaawa ma̱a̱hksayikiihto̱yissaawa omi̱i sao̱mmitaʼpssi, omi̱i Maka̱ʼpatoʼsiyi.

Kiisto̱wa ki̱tohkokki na̱a̱hkitsspssi. Nitsi̱ʼtoomanistohkotayaawa ma̱a̱hksspssaawa. Ki a̱nnihkayii a̱kohkottohkanawanistapssaawa a̱nni niʼtsita̱piiyi. A̱nni niʼto̱i kiisto̱wa ki niisto̱wa niitsi̱ʼtokskaaoʼpi. Niisto̱wa no̱mohpipaitapiiyi amo̱ksi, kiisto̱wa ko̱mohpipaitapiiyi niisto̱wa. Ta̱waatsi̱moihkaahtamoayaawa ma̱a̱hkikkiaʼyaohkanaanistapssaawa a̱nni niʼtsita̱pii. Ki a̱nnihkayii ka̱taʼyaomaiʼtakiiksi a̱kohtsitssksinimiaawa kiisto a̱nnayi kito̱ʼtsskookssi. Ki a̱kitssksinimiaawa niʼto̱i kanista̱komimmahsi amoksi kanista̱komimmokihpi.