Popular Bible Verses from Lukas 23

Share

Oba Jesus säd: Voda, vejeef an, dan see weeten nich waut see doonen! Oba see vedeelden siene Kjleeda, un schmeeten doaräwa daut Loss.

Un hee (Jesus) säd to am: Woarhauft, ekj saj die: Vondoag woascht du met mie em Paradies sennen.

Un hee säd: Jesus, jedenkj aun mie [Har] wan du en dien Rikj kjemst.

Un Jesus roopt met ne lude Stemm un säd: Voda, en diene Henj befäl ekj mienen Jeist. Oba aus hee daut jesajcht haud, frodemd hee dän Jeist ut (storf hee).

Un aus see aun däm Uat jekomen wieren, jenant Schädelstäd, doa kjriezichten see am un de Vebräakja, dän eenen to Rajchte, dän aundren to Linkje.

Un daut wia onjefäa aul de saste Stund, un eene Diestanis kjeem äwa daut gaunze Launt bate näajende Stund. No däm de Sonn sikj vediestat haud, un de Väahank em Tempel reet enne Medd entwei.

Oba aus de Hauptmaun sach, waut passieed, hee lowd (veharlicht) Gott un säd: Werkjlich, disa Mensch wia jerajcht.