Popular Bible Verses from MATAIO 23

Share

A te tino maluga ia koutou, ko te otou tavini tena.

A te tino e fia maluga e fakamalalogina, ka ko te tino e fia malalo e fakamalugagina.”

“Kalofa eiloa ia koutou faiakoga o te Tulafono mo Falesaio! A koutou ne tino 'loi. E tuku atu ne koutou ki te Atua te tasi vae sefulu o fuataga o lakau fo'liki, e pela mo te mili, pekano, mo nisi lakau ake, ka ko tiakina ne koutou a feitu aoga o akoakoga mai i te Tulafono, e pela mo te fai mea tonu, te alofa mo te fakamaoni. E 'tau mo koutou o fai a mea konei, kae mo a foki ma se fai a nisi mea.

“Kalofa eiloa ia koutou faiakoga o te Tulafono mo Falesaio! A koutou ne tino 'loi. E 'fulu ne koutou a te tua o te ipu mo te tifa, ka ko te koga i loto e fonu i mea ne puke malo mo te amio masei.

“Ielusalema, Ielusalema! Ne tamate ne koe a pelofeta, kae peipei ki fatu a ave fekau a te Atua ne uga atu ki a koe! Ko uke a taimi ne manako au o fakapulupulu koutou ki oku lima, e pela eiloa mo se moa fafine e fakapulupulu ana tama ki ona kapakau, kae ne seki talia ne koe au!

E pena foki eiloa a koutou; e kilo'kilo atu a tino ki a koutou i tua, e foliga amiotonu mai, ka ko loto o koutou e 'fonu i te loi mo te amio masei.”