Popular Bible Verses from Genesis 17

Share

Che' lujump'ejlix yic'ot bolomp'ejl i jo'c'al (99) i jabilel Abram, lac Yum tsi' pʌsbe i bʌ Abram. Tsi' sube: Joñon P'ʌtʌl bʌ Dioson. Yom ma' wajñel tic tojlel. Ts'ʌcʌl yom i wenlel a pusic'al ti pejtelel ora. Ts'ʌcʌl yom i yuts'atlel a pusic'al.

Dios tsi' chʌn sube: Ma'anix mi caj a chʌn pejcʌntel ti Abram, “Ñuc bʌ tatʌl”. Mi caj a pejcʌntel ti Abraham, “I tat cabʌlob”, come tsa'ix cotsayet ti' tat winicob x'ixicob ti cabʌl lum.

Mi caj c wa'chocon xuc'ul bʌ c t'an quic'otet quic'ot a p'olbal ti pejtelel ora. Jiñʌch xuc'ul* bʌ c t'an: Joñon a Dioson, i Dioson a p'olbalob.

Mi caj c wa'chocon xuc'ul bʌ c t'an a wic'ot. Mi caj cʌq'ueñet cabʌl a p'olbal. Mi caj a wochel ti' tat winicob x'ixicob ti mojt ti mojt ti cabʌl lum, che'en Dios. Abram tsi' pʌcchoco i bʌ.

Dios tsi' yʌlʌ: Mach jinic i yalobil a wijñam. Sara a wijñam mi caj i yʌq'ueñet ch'iton bʌ a walobil. Mi caj a wotsʌben i c'aba' Isaac. Mi caj c wa'chocon xuc'ul bʌ c t'an yic'ot Isaac, yic'ot i p'olbal Isaac ti pejtelel ora.

Mi caj cʌq'ueñet yic'ot a p'olbal pejtel i lumal Canaán ba' woliyet ti ñumel majlel. La' cha'añʌch ti pejtelel ora, come Dioson, che'en.

Abraham tsi' pʌcchoco i bʌ. Tsi' cha'le tse'ñal. Tsi' yʌlʌ ti' pusic'al: ¿Mejl ba i tilel calobil che' anix jo'c'al c jabilel? ¿Mejl ba i tilel i yalobil Sara che' anix lujump'ejl i jo'c'al i jabilel? Che'ʌch tsi' ña'ta.

Dios tsi' sube: Jixcu Sarai a wijñam, ma'anix mi caj a pejcan ti Sarai. I c'aba'ʌch Sara, “I yixic'al rey”.

Mi caj i tsepbentel la' pʌchʌlel. I yejtalʌch xuc'ul bʌ c t'an tsa' bʌ c wa'choco quic'otet.

Pero jini xuc'ul bʌ c t'an mi caj c wa'chocon yic'ot Isaac mu' bʌ caj i yʌc' ti pañimil Sara che' bajche' ti ili ora ti yambʌ jab. Che' tsi' yʌlʌ Dios.

La' tsepbentic i pʌchʌlel pejtel ch'iton bʌ a p'olbal am bʌ waxʌcp'ejl q'uin. Che'ʌch yom mi' yujtel c'ʌlʌ ti pejtelel ora. La' tsepbentic i pʌchʌlel jini mu' bʌ i q'uel pañimil ti a wotot yic'ot jini mʌmbilo' bʌ a cha'an ti' tojlel yaño' bʌ, mach bʌ a p'olbalic. Jini mu' bʌ i q'uel pañimil ti a wotot yic'ot jini mu' bʌ a mʌn ti a taq'uin mi caj i tsepbentel i pʌchʌlel. Ya' ti la' bʌc'tal mi caj i tsictiyel xuc'ul bʌ c t'an ti pejtelel ora.