Popular Bible Verses from Māa̍ti̍u̍ 10

Share

Mi̍ Chi̍i̍sū hi̍a̍ū lāchī a̍ sūɛ̍i̍ āā, “Lā ya᷄ŋ ni᷅la̍ŋ. I̍ cho̍ māchūāā nya̍ vīōmɔ̄ɔ̍ māā lāsāā vīsīāā bīyāa̍ tɛ̄ɛ̄ŋ. Le̍la̍ŋ, lā wa̍ wa̍nāā mānda᷄ŋ o̍ nyɛ̄ o̍ nyɛ̄ nya̍ wa̍ to̍sāa̍ ni᷄ŋ. Ndu̍yɛ̍, lā wa̍ wa̍nāa̍ cha̍ā ŋ̄wāŋndā chīe̍e̍ bi̍yɔ̄ɔ̄.

Wānā o̍ wāna̍ ki̍ndi̍ le̍ yōōmū ndɔ̄ɔ̍ chīīndīa̍a̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Kɛ̍ ndu̍yɛ̍, wānā o̍ wāna̍ yōōmū ndɔ̄ɔ̍ hɛ̍lu᷄ŋ ndu̍ le̍ ya̍ pɛ̍, mɛ̄ɛ̍ ō chō hūnɔ̄ɔ̄ yōōmū kpe̍e̍kpe̍i̍yo̍ sɔ̄lā.”

Lā wo᷅ wānāa̍ nɔ̍lā mā dīī nya̍ chi̍e̍ēŋ na̍ŋnu᷄ŋ, kɛ̍ ndu̍yɛ̍, ā nɔ̍lā nyɛ̍ yɔ̄ŋ a̍ nyi̍nāā nyāa̍ le̍ wa̍ le̍. Wāna̍ nya̍ wō wo̍, ndu̍ cho̍ Mɛ̄lɛ̄ka̍ ni̍. Ndu̍ ndu̍ nɔ̍lā tē ō dīī nu̍m pɛ̍ chi̍e̍ēŋ na̍ŋnu᷄ŋ, ō yɔ᷄ŋ vɛ̄lɛ̄ nyi̍nā nūmndo̍ o̍ fo̍ndāŋ nyɛ̄ pālāa̍ nāa̍ ndu̍ Mɛ̍lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍.”

O̍ ko̍ŋ kɔ̍ɔ̍lī, wāna̍ ve̍ o̍ bɛ̍ɛ̍ndīa̍ŋ le̍ mā dīī ndu̍ o̍ yɔ̄m sīŋgāfīlāa̍ chōo̍ le̍ sa̍bū nūu̍, ndu̍yɛ̍, mbō tōl la̍ kɔ̄ɔ̄lī le̍, mɛ̄ɛ̍ wānā ko̍ŋ ō bɛ̄nda̍ mbō wa̍ bu̍ɛ̍ī nī le̍.

Mi̍ Chi̍i̍sū di̍mī āā, “Wānā o̍ wāna̍ sɔ̍lɔ̍la̍ŋ pɛ̍ wa᷅ŋnda̍ o̍ hɔ̄l kpe̍nde̍ke̍le̍ māā le̍ ya̍ o̍ cho̍ ni̍, ya̍ bɛ̍ɛ̍ I̍ cho̍ hūnɔ̄ɔ̄ sɔ̄lɔ̄la᷄ŋ Mɛ̄lɛ̄ka̍ Fi̍nyā nūu̍ o̍ hɔ̄l o̍ cho̍ o̍ fo̍ndāŋ ndɔ̄ɔ̍ wo̍ māā le̍ ya̍ wānā ko̍ŋ chō ni̍. Kɛ̍ ndu̍yɛ̍, wānā o̍ wāna̍ di̍mi̍ pɛ̍ wa᷅ŋnda̍ o̍ hɔ̄l kpe̍nde̍ke̍le̍ māā ō cho̍ wa᷅na̍ nī le̍, ya̍ bɛ̍ɛ̍ I̍ cho̍ hūnɔ̄ɔ̄ dīmī Mɛ̄lɛ̄ka̍ Fi̍nyā nūu̍ o̍ hɔ̄l o̍ cho̍ o̍ fo̍ndāŋ ndɔ̄ɔ̍ wo̍ māā wānā ko̍ŋ ō cho̍ wa᷅na̍ nī le̍.”

Lā sīŋgi̍ wa̍nāā lānāāwa̍ mī lā mīŋgi̍ wānāā vīlɛ̍i̍ya̍ yōōmū. Ndu̍yɛ̍, lā sīŋgi̍ wa̍nāa̍ nɔ̍ nāā wɔ̄ɔ̍ŋndo̍ lēkɔ̄ɔ̍ wa̍ mī lā tōū nyi̍nāā wɔ̄ɔ̍ŋnda̍ wāŋnda̍ kɔ̄ɔ̄lī. Fo̍ndō Mɛ̄lɛ̄ka̍ ke̍ nya̍ kpāāyāa̍ ho̍ō ni̍. Le̍la̍ŋ, tē lā tōsa̍l wāŋnda̍ sɔ̄ɔ̍ŋ mu᷅ŋ pɛ̍, lā bi̍ī nda̍ nyɛ̄ o̍ nyɛ̄ o̍ bā sɔ̍ŋgɔ̍ ko̍ŋ te̍.

Le̍la̍ŋ, lā yɔ᷅ŋ īsīōōŋ te̍. Kāni̍ fo̍ndōle̍, wāŋndo̍ ō pīlɛ̍ bɛ̍ɛ̍ nya̍ tɛ̄ɛ̄ŋ ō hīōū a̍ ni᷄ŋnda̍, mɛ̄ɛ̍ o̍ mɛ̄ɛ̍ nda̍ wa̍ fa̍ŋgā.”

Mi̍ Chi̍i̍sū hi̍a̍ū lāchī a̍ sūɛ̍i̍ āā, “Lā yi̍ya᷄ŋ māā kɔ̄l nyūlū le̍ ya̍ hi᷅ŋ lūēī o̍ chi̍e̍ēŋndo̍ ni᷄ŋ te̍. Ō cho̍ kɔ᷅l nyūlū kpo̍so̍ŋ te̍ ya̍ hi᷅ŋ lūēī le̍. I̍ hi᷅ŋ māhūnāā le̍ tōsāa̍ mī pīɔ̄ūvi̍āŋndo̍ de᷄l wāŋnda̍ tɛ̄ɛ̄ŋ.